Si do të ndryshojë transporti publik në Shkup pas projektit BRT?

— Projekti i Transportit të Shpejtë me Autobus (BRT) në Shkup hyn zyrtarisht në fazën e zbatimit pas takimit të punës mes kryetarit të qytetit, Orce Gjorgievski, dhe ekipit të Bankës Evropiane për Rindërtim dhe Zhvillim (BERZH), të udhëhequr nga drejtori Fatih Turkmenoglu.

Ky projekt synon krijimin e një sistemi transporti më efikas dhe të qëndrueshëm, duke u fokusuar në uljen e trafikut të ngjeshur dhe përmirësimin e cilësisë së ajrit. Sipas njoftimit të Qytetit të Shkupit, zbatimi u bë i mundur pas koordinimit intensiv me Qeverinë e Maqedonisë, Ministrinë e Transportit dhe Ministrinë e Financave për të kapërcyer bllokimet e gjata.

Autoritetet urbane theksuan se projekti nuk do të zbatohet në kurriz të gjelbërimit ekzistues të bulevardit. Përkundrazi, planifikimi përfshin krijimin e zona të reja të gjelbra dhe peisazhe shtesë hortikulturore, me qëllim që hapësira urbane të bëhet më moderne dhe më humane për qytetarët e kryeqytetit.

BRT është vetëm një pjesë e strategjisë më të gjerë të modernizimit, ku paralelisht po punohet për futjen e një treni urban dhe blerjen e 100 autobusëve të rinj përmes Qeverisë. Këto hapa synojnë krijimin e një sistemi të integruar të lëvizshmërisë urbane që të jetë më i besueshëm dhe miqësor ndaj mjedisit.

Burim: Shenja
— Redaksia ZHURMA