534 shkencëtarë kërkojnë ndalimin e projekteve në deltën e Vjosës
Megjithëse u shpall park kombëtar në 2023, delta dhe Laguna e Nartës mbetën jashtë kufijve të tij.
TIRANË — 534 shkencëtarë i kërkojnë qeverisë shqiptare të ndalojë projektet e infrastrukturës dhe turizmit në deltën e Vjosës. Peticioni, i titulluar "Thirrje për Ruajtjen Gjithëpërfshirëse dhe Zhvillimin e Qëndrueshëm të Deltës së Vjosës", është udhëhequr nga profesorët Friedrich Schiemer i Universitetit të Vjenës dhe Aleko Miho i Universitetit të Tiranës.
Peticioni iu drejtua kryeministrit Edi Rama, presidentes së Komisionit Evropian Ursula von der Leyen, Sekretariatit të Konventës së Bernës dhe programit "Njeriu dhe Biosfera" (MAB) të UNESCO-s. Sipas nënshkruesve, këto projekte bien ndesh me statusin e mbrojtur të zonës dhe rrezikojnë habitatet, biodiversitetin dhe funksionet ekologjike të deltës.
Delta e Vjosës strehon mbi 2.300 specie të regjistruara, përfshirë më shumë se 200 lloje shpendësh, një nga zonat me biodiversitetin më të lartë në Mesdhe. Megjithëse Shqipëria shpalli luginën e Vjosës park kombëtar në vitin 2023, delta dhe Laguna e Nartës mbetën jashtë kufijve të parkut.
Olsi Nika, drejtori ekzekutiv i EcoAlbania, tha se mbështetja e komunitetit ndërkombëtar shkencor konfirmon vlerat e jashtëzakonshme të deltës. "Vendimet për të ardhmen e trashëgimisë sonë natyrore nuk mund të udhëhiqen nga interesa afatshkurtra apo axhenda politike të momentit," tha Nika.
Shqipëria është përfshirë prej më shumë se 60 ditësh nga protesta kundër qeverisë, e nisur si kundërshtim ndaj një projekti turistik luksoz të planifikuar në Zvërnec, i lidhur me dhëndrin e Presidentit amerikan Donald Trump, Jared Kushner. Protestuesit kërkojnë shfuqizimin e ligjit për zonat e mbrojtura, si dhe dorëheqjen e qeverisë së Kryeministrit Edi Rama.
Shkencëtarët kërkojnë zgjerimin e parkut kombëtar deri në grykëderdhjen e Vjosës dhe hartimin e një modeli zhvillimi të bazuar në ekoturizëm. Nënshkruesit shprehen të gatshëm të kontribuojnë në strategjinë e zhvillimit të qëndrueshëm, duke theksuar se mbrojtja nuk përjashton zhvillimin ekonomik.
Burim: Reporter.al
— Redaksia ZHURMA