Toti: Mbi 100 mijë persona trajtohen për diabetin në Shqipëri

Në Shqipëri trajtohen mbi 100 mijë persona me diabet, ndërkohë që çdo vit regjistrohen nga 8 mijë deri në 10 mijë raste të reja, sipas të dhënave të bëra publike nga mjekët specialistë.

Kjo gjendje shëndetësore paraqitet si një kërcënim i heshtur që shpesh zhvillohet pa simptoma në fillim, por shkakton dëme të rënda në zemër dhe veshka.

Sipas Florian Totit, shef i Shërbimit të Endokrinologjisë në QSUT, rreth 50 mijë persona të tjerë nuk e dinë se vuajnë nga kjo sëmundje. Mjeku Toti thekson se shtimi i rasteve lidhet me plakjen e popullsisë, stresin, jetën sedentare dhe faktorë të tjerë rreziku. Në të njëjtën linjë, mjekët bëjnë thirrje për depistim të hershëm, pasi komplikacionet e rënda mund të çojnë në verbim, dializë apo amputim të gjymtyrëve.

Për fëmijët e moshës 1 deri në 18 vjeç, të prekur nga diabeti i tipit 1, shifrat vlerësohen në rreth 300 deri në 400 fëmijë, me një raport prej 20 për çdo 1000 fëmijë. Për më tepër, drejtorja e QSUT-së, Rudina Degjoni, bëri të ditur se procedurat administrative për pacientët janë thjeshtuar, duke u lejuar atyre që t'i mbyllin të gjitha veprimet brenda ditës në QSUT pa pasur nevojë të kthehen në qendrat e tyre shëndetësore.

Vitin e ardhshëm pritet të nisë rimbursimi i sensorëve të diabetit që ndihmojnë në mbajtjen nën kontroll të sheqerit në gjak te fëmijët.

Florian Toti u shpreh se «shifrat e personave me diabet në Shqipëri nga viti 2025, ka kaluar numrin e 100 mijë personave të trajtuar për diabetin por nuk duhet të harrojmë që ka edhe 50% të tjerë që janë me diabet por ende nuk e dinë».

Rudina Degjoni theksoi se «pacientët vijnë në QSUT dhe i përmbyllin procedurat brenda ditës, pa kërkuar që të kthehen në qendrën e tyre shëndetësore».