Shkarkimet e ujërave të zeza pranë Plazhit të Ri në Vlorë
Problemantika e përsëritur e tubacioneve të shkarkimit të ujërave të zeza pranë Plazhit të Ri dhe ish-Shkollës së Marinës në Vlorë.
VLORË — Pasditen e 29 korrikut, pikat e shkarkimit të ujërave të zeza pranë Plazhit të Ri në Vlorë nuk dalloheshin me syrin e lirë nga shëtitorja e Lungomares, duke fshehur një problematikë të përsëritur prej vitesh që kërkonte zbritje në plazh dhe ecje buzë detit për t'u konstatuar.
Në këtë pjesë të Vlorës, ku përqendrohet shumica e plazhit publik dhe ku çmimet e çadrave me dy shezllone variojnë nga 700 lekë në zonat publike deri në 1500 lekë në ato private, bregu ishte i mbushur me familje, të moshuar, vendas dhe turistë të huaj.
Sipas dëshmive të mbledhura në terren nga gazetarët, tubacionet e shkarkimit ndodhen tek plazhi i ish-Shkollës së Marinës dhe derdhjet kryhen herët në mëngjes, para nisjes së plazhit. Tubat cilindrikë, pjesërisht të mbuluar nga rëra, shtrihen drejt detit pranë zonave të banjuara nga pushuesit, ndërsa prania e tyre shoqërohet me aromë të pakëndshme.