Si e vlerëson SHBA transformimin e FSK-së në forcë mbrojtëse?

PRISHTINË — Ministri në detyrë i Mbrojtjes, Ejup Maqedonci, ka mirëpritur raportin e Kongresit të Shteteve të Bashkuara për Promovimin e Stabilitetit Rajonal dhe Prosperitetit në Ballkanin Perëndimor, i cili konfirmon mbështetjen amerikane për zhvillimin e Forcës së Sigurisë së Kosovës në një forcë moderne, profesionale dhe multietnike të mbrojtjes territoriale.

Në një postim në Facebook, Maqedonci e cilësoi vlerësimin "dëshmi të qartë të progresit të arritur nga Republika e Kosovës në forcimin e kapaciteteve të saj mbrojtëse, në përputhje me standardet euro-atlantike dhe në partneritet të ngushtë me SHBA-në dhe aleatët tanë".

Maqedonci theksoi se "përkrahja amerikane ka qenë dhe mbetet vendimtare" për ndërtimin e një force të aftë për mbrojtjen e sovranitetit dhe integritetit territorial. Ai vlerësoi njohjen e rolit të Kosovës si kontribuuese në sigurinë ndërkombëtare, duke shtuar se angazhimi për paqe dhe stabilitet "dëshmon se Kosova është një partner i besueshëm".

"Kjo pasqyron qartë transformimin e Kosovës nga konsumues i sigurisë në ofrues të saj", deklaroi ai, duke premtuar vazhdimin e investimeve në kapacitete mbrojtëse dhe të aspiratës për "integrim të plotë euro-atlantik".

Burim: Zëri
— Redaksia ZHURMA