Serbia shqyrton ndryshimin e rrjedhës së lumit Ibër

OHËR — Presidenti i Serbisë, Aleksandar Vuçiq, ka deklaruar se autoritetet serbe po shqyrtojnë mundësinë e ndryshimit të rrjedhës së lumit Ibër në territorin e Serbisë, duke e lidhur këtë me qëndrimin e autoriteteve të Prishtinës ndaj serbëve në Kosovë. Një ide të tillë Vuçiqi e kishte përmendur edhe para dy vjetësh.

Sipas Vuçiqit, që nga viti 1985 ekziston një ide për ndryshimin e rrjedhës së lumit Ibër për nevojat e popullsisë në vendbanimet pranë liqenit, veprim ky që mund të ndikonte në uljen e nivelit të ujit në liqenin e Ujmanit, nga i cili furnizohet me ujë Kosova. Ai tha se tashmë janë ftuar ekspertë, inxhinierë dhe përfaqësues të sektorit të ndërtimit për këtë çështje.

Gjithashtu, presidenti serb ka folur edhe për rrënimin e vilave përreth liqenit të Ujmanit, objekte të ndërtuara pa leje që ndodhen në hapësirën nën administrimin e ndërmarrjes publike “Ibër-Lepenc”, ku deri më tani janë rrënuar dhjetëra prej tyre.

Burimet: Tetova Sot, Ora News, Zhurnal.mk, Shenja, Insajderi, Sinjali, Telegrafi, Koha.net.