Serbia kthen prapa tre deputetë të Kosovës që po shkonin për ngushëllime

Autoritetet e Serbisë nuk kanë lejuar që të futen në territorin e saj tre deputetë të Kosovës, të cilët kishin planifikuar të udhëtonin për në Preshevë. Ngjarja është bërë e ditur nga kryetarja e Preshevës, Ardita Sinani, e cila ka treguar se delegacioni nga Republika e Kosovës përbëhej nga deputetet e Kuvendit, Arbërie Nagavci, Fatmire Mullhaxha Kollçaku dhe Liza Gashi. Ato kishin planifikuar të shkonin në shtëpinë e prindërve të saj në Preshevë për t'i shprehur ngushëllime me rastin e vdekjes së babait.

Sipas protokollit dhe njoftimeve të bëra publike, deputetet janë shoqëruar në këtë udhëtim edhe nga ambasadori i Republikës së Kosovës në Beograd, Jetish Jashari, i cili kishte shprehur dëshirën që t'i bashkohet vizitës për ngushëllime. Pjesë e delegacionit ka qenë gjithashtu Ragmi Mustafi, këshilltari i kryeministrit të Republikës së Kosovës, Albin Kurti, për Preshevë, Medvegjë dhe Bujanoc, i cili kishte marrë porosinë nga kreu i ekzekutivit për të përcjellë ngushëllimet nga afër për kryetaren Sinani dhe familjarët e saj.

Megjithëse vizita nuk ishte parashikuar si një vizitë zyrtare, por ishte ndërmarrë për qëllime personale, humane dhe për të ruajtur traditën e përhershme të ngushëllimit të të afërmve në raste vdekjeje, autoritetet serbe kanë vendosur të përfshijnë politikën në këtë situatë. Pas disa orë mbajtje në vendkalimin kufitar me Kosovën në Depcë, autoritetet kufitare njoftuan delegacionin se nuk u lejohet vizita në Preshevë.

Kryetarja e Preshevës, Ardita Sinani, ka reaguar ndaj këtij veprimi duke theksuar se autoritetet e Serbisë gjejnë kënaqësi në refuzimin e lejeve për të vizituar Luginën e Preshevës sa herë që përfshihen zyrtarë shtetërorë të Republikës së Kosovës, qoftë edhe në raste të raporteve ndërnjerëzore dhe ngjarjeve familjare si vdekjet. E detyruar nga këto rrethana dhe e nderuar nga qëllimi i deputeteve dhe i ambasadorit për të qenë pranë saj, ajo ka kaluar në pjesën e Kosovës ku edhe është takuar me ta.