Sekuestrohet dhe asgjësohet mish pule në Strugë e Ohër

STRUGË — Agjencia e Ushqimit dhe Veterinarisë ka ndërmarrë kontrolle të jashtëzakonshme në mishtore, gjatë të cilave janë sekuestruar dhe asgjësuar një mijë kilogramë mish pule, si dhe pesëdhjetë e pesë kilogramë përgatitje të tjera mishi ku ishte përdorur ky produkt. Gjatë këtyre verifikimeve në Strugë dhe Ohër, autoritetet kanë ndërmarrë masa kundërvajtëse ndaj dy subjekteve që nuk kanë respektuar rregullat e përcaktuara për këtë lloj ushqimi.

Aktivitetet e inspektimit vijnë pas vendimit të marrë më parë për të ndaluar importin dhe përdorimin e mishit të pulës për konsum njerëzor, me qëllim mbrojtjen e shëndetit publik nga rreziqet e mundshme dhe parandalimin e keqpërdorimeve në tregti.