Gjini: Nuk guxojmë të eksperimentojmë me institucionet dhe Kushtetutën

Kryetari i Aleancës, Ardian Gjini, ka deklaruar se lufta për liri dhe sakrifica e Ushtrisë Çlirimtare të Kosovës janë pjesë e themelit të shtetit, duke theksuar se nuk guxohet të eksperimentohet me institucionet dhe Kushtetutën e Kosovës, pasi çfarëdo cenimi i këtyre tri elementeve e dëmton seriozisht shtetin.

Sipas deklaratave të kryetarit të Aleancës, Ardian Gjini, synimi për liri në vitet e ’90-ta ishte një frymëzim i madh për të rinjtë dhe të rejat që u bënë gati të sakrifikonin jetën për vendin. Gjini ka theksuar se lufta e popullit dhe gjaku i dëshmorëve të Ushtrisë Çlirimtare të Kosovës përbëjnë fundamentin e lirisë dhe të shtetësisë, ndaj çfarëdo nëpërkëmbje apo përdorim i keq i kësaj vlere dëmton drejtpërdrejt bazën mbi të cilën është ngritur Kosova.

Më tej, kryetari i Aleancës, Ardian Gjini, ka nënvizuar se Kushtetuta është kontrata e përbashkët e shtetit dhe e qytetarëve, e cila duhet të respektohet nga të gjithë, pavarësisht nëse ekzistojnë mospajtime me dispozita të caktuara. Gjini ka shpjeguar se mënyra se si i qasemi dhe sillemi kundrejt normave të vendosura vetë është element kyç për funksionimin e çdo shteti. Ai ka paralajmëruar se ekziston një tendencë që këto tri shtylla të nëpërkëmben jo vetëm nga jashtë, por nganjëherë edhe nga brenda, duke shtuar se ata që nuk e kuptojnë këtë fundament e rrezikojnë të ardhmen e Kosovës dhe të fëmijëve.

Gjatë aktiviteteve partiake, ku Aleanca ka shënuar Ditën e Rinisë dhe Gjini ka bashkëbiseduar me të rinjtë për kapitullin e ri, ai ka deklaruar gjithashtu para strukturave të partisë se një ditë jo të largët do të jenë në pushtet.

«Lufta jonë për lirinë, lufta e popullit për liri është pjesë e fundamentit e themelit në të cilin ky shtet është ndërtuar dhe liria jonë është ndërtuar. Çfarëdo përdorimi në mënyrë të keqe, ose çfarëdo nëpërkëmbje e kësaj vlere, e dëmton themelin e shtetit tonë», ka thënë Gjini. Ai ka shtuar gjithashtu: «Nuk eksperimentojmë se është kontrata jonë, sikur e çdo shteti tjetër. Jemi pajtuar, po jemi pajtuar edhe me diçka që në çdo Kushtetutë të botës është themeltare».