Gjini thotë se opozita duhet të përgatitet për të ardhur në pushtet

Kryetari i Aleancës, Ardian Gjini, ka thënë se opozita duhet të përgatitet për qeverisje duke hartuar politika që adresojnë nevojat e qytetarëve, përfshirë sigurinë, rritjen e pagave e pensioneve, si dhe përmirësimin e arsimit dhe shëndetësisë. Gjini i bëri këto deklarata gjatë shpalosjes së platformës politike dhe strategjisë për zhvillimin e Kosovës para strukturave të partisë.

Gjini ka theksuar se qytetarët kërkojnë një të ardhme më të sigurt, mundësi më të mira për fëmijët e tyre dhe ndaljen e emigrimit masiv të të rinjve. Gjatë fjalës së tij, ai ka përmendur gjithashtu nevojën për infrastrukturë më të mirë, një ushtri më të fortë dhe fuqizimin e pasaportës së Kosovës. Kjo mbledhje e strukturave të partisë u mbajt për të paraqitur programin politik të Aleancës, ku mori pjesë edhe Ramush Haradinaj.

Sipas kryetarit të Aleancës, zhvillimet e tanishme në vend nuk po e afrojnë qytetarin drejt përmbushjes së synimeve të tij. Gjini ka kritikuar drejtimin aktual, duke deklaruar se në Kosovë po dekurajohet ndërmarrësia dhe po mbytet iniciativa e lirë, gjë që sipas tij pengon zhvillimin ekonomik. Ai ka shtuar se pushteti po i godet punonjësit dhe se mirëqenia e pensionistëve nuk mund të rritet nëse inflacioni është më i lartë se rritja e pensioneve.

Kreu i Aleancës ka bërë thirrje për më shumë tolerancë dhe bashkëpunim mes qytetarëve, pavarësisht bindjeve politike, duke kërkuar që bashkëqytetarët të mos shihen si armiq. Ai ka kërkuar po ashtu respektim dhe pranim të plotë të bashkësisë ndërkombëtare.

«Është e jashtëzakonshme që duhet me pasë demokraci, pasi jemi thelbi i kësaj ure. Por, në të njëjtën kohë me u përgatitë për shkak se ne sot që jemi në opozitë, jemi në një ditë jo të largët në pushtet. Na duhet tash me u përgatitë për politika», ka thënë Gjini para strukturave të partisë.

«Çka don populli i Kosovës? Çka dojmë prej vendit tonë? Po dojmë siguri. Siguri që nënkupton me u ni sigurt në vendin tonë, jo vetëm fizikisht, por me e ni sigurinë për të ardhmen tonë, për të ardhmen e fëmijëve tonë. Me e parashikua të ardhmen, edhe me e ditë që ajo ardhmëri mundet me e sjellë veç të mira. Veç të mira. Ne duam paga më të larta, sikur gjithë të tjerët, për gjithë popullin tonë. Duam pensione më të larta, duam shkolla më të mira, duam spitale më të mira, rrugë më të mira. Duam ushtri më të fortë, duam pasaportë më të fuqishme. Duam ndalje të emigrimit masiv të të rinjve edhe të rejave tona», ka shtuar ai.

«Duam, duam mos me e urrejt njëri-tjetrin. Me e pa bashkëqytetarin tonë si vëlla, si motër, si bashkëpunëtor, si mik, pavarësisht bindjeve tona politike, jo me e pa njëri-tjetrin si armik. Duam me qenë të respektum edhe me e pranu plotësisht bashkësinë ndërkombëtare», ka deklaruar Gjini.