Seancë gjyqësore për sulmin terrorist në kanalin e Ibër-Lepencit
Të hënën mbahet seanca në Pallatin e Drejtësisë për sulmin e ndodhur më 29 nëntor 2024 në Varagë të Zubin-Potokut.
Redaksia ZHURMA · · 1 min lexim
Në Pallatin e Drejtësisë në Prishtinë do të mbahet seanca gjyqësore lidhur me rastin e sulmit në kanalin e Ibër-Lepencit. Ngjarja kishte ndodhur më 29 nëntor 2024 në fshatin Varagë të Zubin-Potokut, duke shkaktuar dëme të konsiderueshme në një prej objekteve më të rëndësishme të infrastrukturës ujore dhe energjetike të vendit.
Prokuroria Speciale e Kosovës ka ngritur aktakuzë ndaj tre të pandehurve, të cilët akuzohen për armëmbajtje pa leje. Ndërkohë, dy prej tyre, Jovan dhe Dragisha Viqentijeviq, përballen gjithashtu me akuza shtesë për rrezikimin e rendit kushtetues përmes shkatërrimit ose dëmtimit të instalimeve dhe pajisjeve publike, kryerjen e veprës terroriste dhe spiunazh.
