SBASHK-u i bashkohet Marshit për Liri të 12 shtatorit në Prishtinë

GJILAN — Sindikata e Bashkuar e Arsimit, Shkencës dhe Kulturës i është bashkuar zyrtarisht organizimit të Marshit për Liri, i cili do të mbahet më 12 shtator në Prishtinë. Përfaqësuesit e platformës qytetare “Liria Ka Emër”, Eliza Hoxha dhe Ismail Tasholli, u takuan me kryetarin e SBASHK-ut, Rrahman Jashari, ku u konfirmua mbështetja e kësaj sindikate për këtë ngjarje. Sipas platformës qytetare, përkrahja e komunitetit arsimor i jep forcë shtesë mesazhit për liri, drejtësi dhe dinjitet, si dhe mbështetjes për ish-krerët e Ushtrisë Çlirimtare të Kosovës, Hashim Thaçi, Kadri Veseli, Jakup Krasniqi dhe Rexhep Selimi, të cilët po përballen me procesin gjyqësor në Hagë. Ky zhvillim vjen në vazhdën e sigurimit të mbështetjeve të ndryshme publike për protestën e paralajmëruar.