Saliuka shndërron oborrin e shtëpisë në galeri

GJAKOVË — Në kuadër të këtij edicioni, në Gjakovë është hapur ekspozita "Histori në gur" e skulptorit Gëzim Saliuka, i cili tash e tri dekada jeton në Holandë. Për kritikët e artit, "Histori në gur" nuk është vetëm një ekspozitë skulpture, por edhe akti i hapjes së një hapësire të re artistike në Gjakovë – një oborr që shndërrohet në skenë kulture, në vendtakim dhe në një atelie të gjallë të kujtesës.

"Një punë mbi 40-vjeçare mes Kosovës dhe Holandës. Gëzimi vjen edhe në oborrin e vet, i cili shndërrohet në një pikë kulturore, në një muze të hapur, në një galeri ku së shpejti shpresojmë që jo vetëm qytetarët e Gjakovës, por edhe një numër i madh të rinjsh, ta shohin skulptorin gjatë punës, duke gdhendur dhe duke trajtuar tema të ndryshme të estetikës së Gëzimit", thaksoi Skënder Boshtrakaj, kurator arti.

Ekspozita "Histori në gur" paraqet një larmi qasjesh formale, ku shumë prej skulpturave ndërtohen mbi figurën njerëzore: kokat, bustet dhe trupat e deformuar në mënyrë poetike. Një pjesë e veprave paraqesin botën zoomorfe, mitike dhe simbolike, figura që pasqyrojnë mbetjet e një civilizimi të harruar.

Burim: Zëri, http://www.zeri.info/kultura/631253/histori-ne-gur-saliuka-shnderron-oborrin-e-shtepise-ne-galeri-te-hapur/
— Redaksia ZHURMA