Salis: Qeveria ka zgjedhur gazin dhe plumbat ndaj protestuesve

Gjatë diskutimit për progres-raportin e Shqipërisë në Parlamentin Evropian, i cili u prezantua nga komisionerja për Zgjerimin Marta Kos, eurodeputetja italiane Ilaria Salis ka ngritur shqetësimin për situatën politike dhe ka kërkuar dorëheqjen e kryeministrit Edi Rama. Salis theksoi se në vend ka shumë zëra që nuk janë dëgjuar, duke u dhënë mbështetje të rinjve që kanë muaj që protestojnë për një vend pa korrupsion, ku të kenë mundësi të studiojnë, të punojnë dhe të ndërtojnë të ardhmen me dinjitet.

Sipas eurodeputetes, protestuesit përfaqësojnë pjesën e shoqërisë që bën fushatë për të mbrojtur vendin me mesazhin se Shqipëria nuk është për shitje. Ajo akuzoi qeverinë se, në vend që të dëgjojë kërkesat e tyre, ka zgjedhur represionin, dhunën, gazin lotsjellës dhe plumbat e gomës, duke abuzuar kështu me pushtetin. Po ashtu, ajo ngriti shqetësimin për propozimin që protestuesit të përballen me gjoba deri në 5 mijë euro, duke u bërë thirrje institucioneve europiane dhe qytetarëve që të mos i lënë të rinjtë shqiptarë vetëm, pasi lufta e tyre është edhe çështje e Evropës.