Salianji: Rama të mbajë përgjegjësi për kutinë me euro në vilën e Ballukut

Ish-deputeti i Partisë Demokratike, Ervin Salianji, deklaroi se kryeministri Edi Rama duhet të mbajë përgjegjësi politike lidhur me kutinë e zbuluar me kartëmohenda euro në vilën e ish-zëvendëskryeministres Belinda Balluku, ndërsa qytetarët përballen me vështirësi ekonomike për të mbyllur muajin.

Materialet e dosjes së SPAK-ut kanë sjellë në vëmendje një vilë luksoze në Dhërmi, të fshehur në emër të Belinda Ballukut, ku gjendet një kuti e mbushur me tufa kartëmonedhash prej 50 eurosh, duke ngritur pikëpyetje të rënda mbi pasurinë dhe skandalet e korrupsionit që përfshijnë njerëzit e afërt të qeverisë.

Në reagimin e tij publik, ish-deputeti Salianji u bëri thirrje institucioneve të drejtësisë që të zbardhin ngjarjen. Sipas tij, SPAK duhet t'u japë përgjigje qytetarëve nëse janë verifikuar fizikisht paratë që shfaqen në fotografi, kujt i përkasin ato, nga e kanë origjinën, si dhe pse nuk ka ende masa sigurie personale për përgjegjësit, ndërkohë që qytetarë të zakonshëm janë arrestuar edhe për shuma të vogla prej 35 mijë lekësh të vjetra.

Salianji vuri theksin tek fakti se vendi nuk duhet të jetë bankomat për pushtetin, ndërsa kërkoi gjithashtu një detyrim publik nga vetë Partia Demokratike. Sipas deklaratës së tij, kjo forcë politike duhet të bëjë transparente për qytetarët materialet e plota të dosjes ashtu siç kanë ardhur në Këshillin e Mandateve, për të larguar çdo hije dyshimi se aty mund të ketë prova apo komunikime që implikojnë drejtues të lartë të saj në marrëdhënie korruptive dhe pazare politike.

Kryeministri Edi Rama, sipas Salianjit, nuk mund të fshihet pas heshtjes dhe as të sillet sikur nuk ka asnjë lloj përgjegjësie për zyrtarët që ka promovuar dhe vendosur në krye të qeverisë, ndërsa qytetarëve u kërkohet sakrificë përmes rritjes së taksave dhe rëndimit të sipërmarrjes.