Sadiku: Faqja e ARBK-së ekspozon të dhëna private të bizneseve
Deputeti i LDK-së kërkon ndërhyrjen e Policisë dhe Prokurorisë Speciale, pasi dyshon për "scraping" masiv në faqen e ARBK-së.
PRISHTINË — Deputeti i sapozgjedhur i LDK-së, Ermal Sadiku, ka njoftuar se përmes faqes së internetit të Agjencisë së Regjistrimit të Bizneseve të Kosovës (ARBK) janë ekspozuar publikisht të dhëna personale të pronarëve të bizneseve, përfshirë kopje të letërnjoftimeve, nënshkrime dhe dokumente të tjera.
Sadiku tha se faqja e ARBK-së po përballet edhe me mbingarkesë të vazhdueshme dhe shprehu dyshimin se përmbajtja e saj po "scrapohet" në mënyrë masive nga qindra kërkesa automatike, çka mund të jetë duke shkaktuar edhe problemet teknike.
Ai kërkoi ndërhyrje të menjëhershme nga Policia e Kosovës, përkatësisht njësitë për krime kibernetike, si dhe nga Prokuroria Speciale, për të hetuar nëse ka pasur qasje të paautorizuar apo keqpërdorim të të dhënave të bizneseve.
Deputeti shtoi se ka frikë se të dhënat mund të grumbullohen për keqpërdorim të mëvonshëm, përfshirë për qëllime politike ndaj bizneseve, duke kujtuar se raste të ngjashme janë parë edhe në të kaluarën.
Burim: Lajmi.net
— Redaksia ZHURMA