Sa topa BORAN blen Shqipëria nga Turqia?

TIRANË — Shqipëria nënshkroi kontratë me kompaninë turke MKE për furnizimin me gjashtë sisteme topash BORAN 105 mm, si edhe municionin përkatës. Sistemi, i pajisur me GPS dhe radar të integruar, ka rreze maksimale qitjeje deri në 17 kilometra dhe mund të realizojë 6 deri në 12 qitje në minutë.

Shqipëria bëhet vendi i tretë në botë pas Bangladeshit dhe Maqedonisë së Veriut që pajiset me këtë sistem artilerie. Topat, me peshë rreth 1.700 kilogramë, janë të transportueshëm me helikopterët Sikorsky Black Hawk të Forcave Ajrore të Shqipërisë.

Pajisja përfshin radar për matjen e shpejtësisë, matës lazer të distancës, dhe kompjuter balistik për kontrollin e zjarrit. Sistemi është projektuar për integrim në arkitekturën e komandës dhe kontrollit të mbështetur në rrjet, duke mundësuar operim në mjedise të përbashkëta ushtarake.

Burim: Shqiptarja
— Redaksia ZHURMA