Sa punëtorë ballkanikë do të punësohen në Gjermani pas 2027?
Berlini përgjysmon kuotat vjetore të emigrantëve nga 50.000 në 25.000 persona, megjithëse nuk ka dëshmi se ata marrin vendet e punës gjermanëve.
BERLIN — Para 2027-ës, Gjermania do të përgjysmojë kuotat e punësimit për qytetarët e Ballkanit Perëndimor — nga 50.000 në vetëm 25.000 persona në vit. Vendimi godet drejtpërdrejtë kërkuesit e punës nga Shqipëria, Kosova, Maqedonia e Veriut dhe vendet e tjera të rajonit që mbështeteshin në "Rregulloren e Ballkanit Perëndimor" për t'u punësuar pa kualifikime të larta.
Zyrtarisht, Qeveria gjermane e justifikon këtë me rritjen e papunësisë brenda Gjermanisë. Megjithatë, analistët dhe mediat ndërkombëtare, si Deutsche Welle, ngrenë pikëpyetje — nuk ekziston provë se punëtorët ballkanikë po u marrin vendet e punës gjermanëve. Gara për vizat e punës do të jetë më e egër, me shumë më pak shanse suksesi.
Rrugët alternative mbeten, si "Karta e Mundësive" (Chancenkarte), por kërkojnë kritere strikte: njohjen e gjuhës gjermane, përvojë të certifikuar dhe pikë të grumbulluara përpara se të hysh në territorin gjerman pa një vend pune të siguruar. Për shtetasit jashtë BE-së, kërkesat janë edhe më të rrepta.
Ky vendim përfundon epokën e emigrimit të lehtësuar për Ballkanin drejt Gjermanisë, duke ngushtuar mundësitë e punësimit jashtë BE-së për të gjithë rajonin.
Burim: Gazeta Express
— Redaksia ZHURMA