Sa persona u intervistuan dhe u proceduan në gjykatë pas manifestimeve të Vidovdanit?

PRISHTINË — Policia e Kosovës ka dhënë detaje për zhvillimin e manifestimeve të Vidovdanit, të cilat u mbajtën sot më 28 qershor 2026 në Kosovë. Sipas njoftimit zyrtar, autoritetet policore kishin ndërmarrë masa të gjera planifikuese dhe operative për menaxhimin e situatës së sigurisë, ruajtjen e rendit publik, orientimin e trafikut rrugor dhe menaxhimin kufitar.

Në të gjitha departamentet dhe rajonet policore u zbatuan masa të nevojshme planifikuese, koordinuese, parandaluese dhe operativo-hetimore, në mënyrë që manifestimet në lokacionet e parashikuara të zhvilloheshin qetë dhe pa incidente.

Referuar informacioneve nga njësitet e angazhuara policore në terren, nuk është raportuar ndonjë rast i cili ka ndikuar në mbarëvajtjen e manifestimeve. Policia konfirmoi se 37 persona u shoqëruan në stacion policor për intervistim, pasi kishin provokuar masën me thirrje provokuese me elemente të nxitjes së urrejtjes, në kundërshtim me dispozitat ligjore.

Një personi tjetër i është shqiptuar gjobë për prishje të rendit dhe qetësisë publike. Policia theksoi se të gjitha veprimet policore janë realizuar në bashkëpunim dhe koordinim me organet e drejtësisë. Pas intervistimit, 37 persona janë proceduar në gjykatë dhe janë në pritje të vendimit nga gjykata.

Pas përfundimit të aktiviteteve në orët e pasdites, të gjithë pjesëmarrësit janë shpërndarë të qetë. Policia e Kosovës falënderon qytetarët për bashkëpunimin dhe mirëkuptimin e treguar, duke theksuar se mbetet e përkushtuar në realizimin e detyrave dhe autorizimeve të saj ligjore, menaxhimin e situatës së sigurisë dhe zbatimin e Kushtetutës së Republikës së Kosovës në funksion të garantimit të një mjedisi të qetë e të sigurt për të gjithë qytetarët pa dallim.

Burim: Lajmi.net
— Redaksia ZHURMA