Pse përmirësohet bilanci tregtar i Kosovës me Greqinë?

PRISHTINË — Oda Ekonomike e Kosovës ka vlerësuar se të dhënat më të fundit të Agjencisë së Statistikave të Kosovës (ASK) për vitin 2025, të lidhura me tregtinë e jashtme të mallrave me Greqinë, Poloninë dhe Arabinë Saudite, pasqyrojnë një tablo të përzier të marrëdhënieve ekonomike të vendit me këto tregje.

Përmirësimi i bilancit tregtar me Greqinë shihet si sinjal pozitiv, i nxitur nga rritja e eksporteve dhe ulja e importeve. Sipas ASK-së, deficiti tregtar me Greqinë është zvogëluar në 269.5 milionë euro, krahasuar me 308.8 milionë euro në vitin 2024, një ulje prej 12.7%. Eksportet drejt Greqisë kanë rritur ndjeshëm duke arritur në 9.5 milionë euro, një rritje prej 46.1%, ndërsa importet kanë rënë në 279.1 milionë euro, ulje prej 11.5%. Mbulueshmëria e importit nga eksporti është rritur nga 2.1% në 3.4%.

Ndryshe nga Greqia, shkëmbimet tregtare me Poloninë kanë regjistruar thellim të deficitit tregtar. Deficiti është rritur në 269.2 milionë euro, nga 205.7 milionë euro një vit më parë, një rritje prej 30.9%. Eksportet kanë mbetur të ulëta në 3.5 milionë euro, ndërsa importet kanë arritur në 272.7 milionë euro. Mbulueshmëria eksport/import mbetet vetëm 1.3%.

Tregtia me Arabinë Saudite ka shënuar përmirësim të lehtë të bilancit tregtar. Deficiti është zvogëluar në 182.1 milionë euro, nga 183.1 milionë euro në vitin 2024, ulje prej 0.6%. Eksportet e Kosovës kanë mbetur pothuajse të pandryshuara në 1.5 milionë euro, ndërsa importet kanë arritur në 183.6 milionë euro. Mbulueshmëria e importit nga eksporti mbetet 0.8%.

Sipas Odës Ekonomike të Kosovës, këto të dhëna nënvizojnë nevojën për politika më aktive të mbështetjes së eksportit dhe diversifikimit të tregjeve, veçanërisht në drejtim të Polonisë dhe vendeve të Lindjes së Mesme. Oda theksoi se Greqia paraqet përmirësimin më të dukshëm përmes rritjes së eksporteve dhe uljes së importeve, ndërsa Polonia mbetet një treg me potencial por me hendek të madh tregtar në favor të importeve. Arabia Saudite vazhdon të dominohet nga importet, duke treguar hapësirë për zgjerimin e pranisë së produkteve kosovare në tregjet e Lindjes së Mesme.

Oda theksoi se rritja e konkurrueshmërisë së prodhimit vendor dhe forcimi i diplomacisë ekonomike mbeten kyçe për përmirësimin afatgjatë të bilancit tregtar të Kosovës.

Burim: Gazeta Express, Agjencia e Statistikave të Kosovës (ASK)
— Redaksia ZHURMA