Sa investon Shqipëria për arsimin krahasuar me BE-në?
Raporti i ri i UNICEF-it zbulon hendekun e madh në shpenzimet për arsim dhe mbrojtje sociale, në një kohë kur numri i fëmijëve në vend po bie me shpejtësi.
TIRANË — Shqipëria po përballet me rënie të ndjeshme të numrit të fëmijëve, teksa investimet në arsim mbeten nën mesataren e Bashkimit Europian. Sipas UNICEF-it, fëmijët përbëjnë vetëm 19.1% të popullsisë prej 2.4 milionë banorësh (rreth 460 mijë), një rënie e madhe nga 26.4% në vitin 2011.
Kjo tkurrje lidhet me lindshmërinë e ulët dhe emigracionin. Për arsimin, vendi shpenzon vetëm 2.6% të Prodhimit të Brendshëm Bruto, krahasuar me mesataren e BE-së prej 4.6%. Hendeku thellohet edhe në mbrojtjen sociale, ku alokohet 9.6% e PBB-së përballë mesatares europiane prej 20.5%.
Nga këto fonde, vetëm 5% shkojnë për shërbimet e kujdesit, ndërsa bashkitë shpenzojnë më pak se 2% të buxheteve të tyre. Kjo cenon aksesin në arsim dhe shëndetësi të fëmijëve me aftësi të kufizuara, atyre romë e egjiptianë dhe atyre në zona rurale.
Megjithatë, ka përmirësime: rreziku i varfërisë për fëmijët ra në 26.6% në vitin 2024 dhe shkalla e të rinjve jashtë punës e arsimit zbriti në 22.2%. Pavarësisht progresit të lehtë, pa investime prioritare, fëmijët shqiptarë do të mbeten prapa bashkëmoshatarëve europianë.
Burim: Gazeta Express
— Redaksia ZHURMA