Sa e rrallë është teratoma që u largua nga foshna e një të porsalinduri në Kosovë?

PRISHTINË — Ekipi i Klinikës së Kirurgjisë Maksilofaciale në Qendrën Klinike Universitare të Kosovës (QKUK) ka kryer me sukses një ndërhyrje kirurgjikale urgjente dhe të rrallë tek një i porsalindur njëjavësh, i diagnostikuar me teratomë kongjenitale orofaringo-nazofaringeale (Epignathus). Kjo patologji, me incidencë prej 1 në 35.000 deri në 1 në 200.000 lindje të gjalla, rrezikonte seriozisht frymëmarrjen dhe ushqyerjen e foshnjës.

Teratoma, e shoqëruar me mortalitet të lartë deri në 80–100% nëse nuk ndërhynet në kohë, u diagnostikua herët nga ekipi i Klinikës së Neonatologjisë. Pas sigurimit emergjent të rrugëve të frymëmarrjes, pacienti u nënshtrua ekzaminimeve radiologjike dhe vlerësimit multidisiplinar, duke përfshirë specialistë nga Neonatologjia, Anesteziologjia, Radiologjia dhe Instituti i Patologjisë.

Ndërhyrja kirurgjikale u krye nga ekipi i Klinikës së Kirurgjisë Maksilofaciale, i cili arriti të largojë tumorin në tërësi. "Tumori u largua me ruajtjen maksimale të strukturave anatomike përreth dhe pa komplikime intraoperative," thuhet në njoftimin e QKUK. Foshnja tashmë merr frymë spontanisht dhe ushqehet normalisht, duke vazhduar të jetë nën mbikëqyrjen e ekipeve mjekësore.

Kjo ndërhyrje është një nga rastet e rralla në Kosovë dhe në rajon, ku një patologji e tillë trajtohet me sukses në një fazë kaq të hershme. Menaxhimi i saktë dhe bashkëpunimi ndërdisiplinar ishin faktorët kyç për rezultatin pozitiv, duke shënuar një sukses të rëndësishëm për mjekësinë kosovare.

Burim: Lajmi.net
— Redaksia ZHURMA