Runa: Politika shqiptare po kalon në fazën më populiste të saj

Politika shqiptare po kalon në fazën më populiste të saj, ku retorika politike nuk përdoret vetëm për fushatë, por është shndërruar në gjuhën kryesore përmes së cilës shpjegohet realiteti shoqëror sipas analizës së ngritur nga Bjorn Runa mbi zhvillimet e fundit.

Institucionet e dobëta dhe konfliktet politike me intensitet të lartë kanë krijuar historikisht një terren të përshtatshëm ku populizmi gjen hapësirë në vend, duke i tejkaluar dallimet tradicionale mes palëve garuese, siç vërehet në dinamikat e muajve të fundit gjatë protestave dhe diskutimeve publike.

Sipas Runa, Revolucioni Flamingo dhe protestat e zhvilluara përgjatë më shumë se pesë muajve shfaqin një retorikë gjithnjë e më moralizuese dhe absolute, e cila mbështetet te ndarja mes heronjve dhe tradhtarëve, si dhe te teori konspirative për shpopullimin dhe zëvendësimin e popullsisë me grupe të huaja. Çdo sfidë shoqërore, sipas kësaj lëvizjeje, reduktohet te korrupsioni dhe te besimi i tejskajshëm te prokurorët e gjykatat, ndërsa çështjet klasore, pabarazia dhe shpërndarja e fuqisë ekonomike mbeten periferike. Runa thekson se i gjithë sistemi vazhdon të reduktohet gabimisht te binomi Rama-Berisha, duke krijuar idenë se heqja e tyre mjafton për të prodhuar një Shqipëri ndryshe.

Nga ana tjetër, qeveria po përgjigjet ndaj këtyre zhvillimeve me një formë të populizmit teknologjik, duke ofruar platforma digjitale, dokumente dhe kanale komunikimi të drejtpërdrejta në adresën elektronike të Kryeministrisë me premtimin se teknologjia do të shkurtojë distancën mes qytetarit dhe shtetit. Megjithatë, Runa vëren se si protestat, ashtu edhe qeveria, ndajnë një padurim të përbashkët, ku transparenca digjitale nuk mund të zëvendësojë politikën dhe as të garantojë nëse vetë ligji apo vendimet e marra janë të drejta në thelb.