Çfarë ndryshime sjell vendimi i ri i qeverisë për kalimin e kufirit?

TIRANË — Këshilli i Ministrave ka miratuar një paketë të re rregullash që riformaton procedurat e verifikimit në pikat kufitare të Shqipërisë, duke u përafruar standardëve të "Kodin e Kufijve Shengen" të BE-së. Vendimi shfuqizon rregulloret e viteve 2016 dhe 2023, duke vendosur filtra të rreptë për udhëtimin e fëmijëve dhe procedura të përshpejtuara për VIP-at dhe transportin ndërkombëtar.

Pjesa më e rëndësishme e vendimit synon të luftojë trafikimin dhe braktisjen e të miturve. Fëmijët nën 16 vjeç do të udhëtojnë vetëm të shoqëruar nga një i rritur, me një deklaratë noteriale të firmosur nga të dy prindërit. Deklaratat e hartuara jashtë vendit duhet të jenë në shqip dhe anglisht. Për moshat 16-18 vjeç, lejohet udhëtimi pa shoqërues, por kërkohet deklaratë noteriale me adresën e saktë të pritësit dhe garancinë e mosbraktisjes.

Policia Kufitare ka kompetenca të zgjeruara për të bllokuar kalimin në rast dyshimi. Nëse konstatohet braktisje e një të mituri në një shtet tjetër, njoftohet Prokuroria, Agjencia për Mbrojtjen e Fëmijëve dhe autoritetet ndërkombëtare. Për fëmijët me prindër të divorcuar, shoqëruesi duhet të paraqesë vendimin gjyqësor për kujdestarinë, i cili regjistrohet në sistemin TIMS.

Kategoritë me kalim të përshpejtuar përfshijnë krerët e shteteve, mbajtësit e pasaportave diplomatike, punonjësit e OKB-së, BE-së dhe NATO-s, si dhe ekipet e kërkim-shpëtimit. Qytetarët që kalojnë kufirin çdo ditë për punë do të kenë verifikime të thjeshtuara. Rregullat ndryshojnë sipas mjetit të transportit: makinat kontrollohen brenda, autobusët në terminale, ndërsa avionët vetëm në aeroportin e parë të mbërritjes.

Vendimi hyn në fuqi pas botimit në Fletoren Zyrtare, me detyrim për Drejtorinë e Përgjithshme të Policisë së Shtetit të përditësojë sistemet kompjuterike dhe udhëzuesit e brendshëm.
Burim: Telegrafi
— Redaksia ZHURMA