Si do të ndryshojnë rregullat e kalimit të kufirit për të miturit dhe VIP-at në Shqipëri?

TIRANË — Qeveria shqiptare ka miratuar një paketë të re rregullash për kalimin e kufirit, duke shfuqizuar vendimet e viteve 2016 dhe 2023. Vendimi i ri synon të përafrojë procedurat me "Kodin e Kufijve Shengen" të BE-së, duke vendosur standarde të reja për kontrollin e të miturve, VIP-ave dhe mjeteve të transportit.

Pjesa më e rëndësishme e vendimit prek udhëtimin e fëmijëve nën 18 vjeç. Të miturit nën 16 vjeç mund të udhëtojnë vetëm të shoqëruar nga një i rritur, me një deklaratë noteriale të nënshkruar nga të dy prindërit — ose nga prindi me kujdestari ligjore. Deklarata duhet të jetë në shqip dhe anglisht nëse është hartuar jashtë vendit.

Për grupmoshën 16-18 vjeç, lejohet udhëtimi pa shoqërues, por kërkohet gjithmonë një deklaratë noteriale nga prindërit. Në rast divorci, shoqëruesi duhet të ketë lejen e të dy prindërve ose vendimin gjyqësor për kujdestari. Të dhënat e vendimeve gjyqësore do të regjistrohen në sistemin elektronik TIMS të kufirit.

Policia kufitare ka kompetenca të zgjeruara për të bllokuar kalimin nëse ka dyshime për trafikim ose braktisje. Në rast dyshimi, shoqëruesi intervistohet dhe dokumentet verifikohen me kujdes. Nëse konstatohet braktisje, njoftohen Prokuroria, Agjencia për Mbrojtjen e Fëmijëve dhe autoritetet ndërkombëtare.

Ndërkohë, zyrtarët e lartë shtetërorë, mbajtësit e pasaportave diplomatike dhe punonjësit e organizatave ndërkombëtare (OKB, BE, NATO) do të përfitojnë kalim të përshpejtuar. Trupat e NATO-s, punonjësit e kërkim-shpëtimit dhe qytetarët që kalojnë kufirin çdo ditë për punë do të kenë verifikime të thjeshtuara.

Burim: Gazeta Express
— Redaksia ZHURMA