Pse pritet rritje e re e çmimeve të derivateve të naftës?

SHKUP — Kryeministri i Maqedonisë, Hristijan Mickoski, njoftoi se qeveria ka shlyer euroobligacionin e vitit 2020 në vlerë prej 700 milionë euro, të cilin e kishte marrë qeveria e mëparshme, duke e kthyer atë para afatit dhe duke kursyer disa miliona euro. Sipas tij, gjatë dy viteve të fundit janë shlyer ose riprogramuar rreth 4,5–4,6 miliardë euro borxh, të krijuara kryesisht gjatë qeverisjes së LSDM-së dhe BDI-së, në pjesën më të madhe gjatë shtatë viteve të tyre.

Mickoski theksoi se kjo qeveri ka gjetur mjetet edhe për projekte infrastrukturore dhe ka nënshkruar marrëveshje kolektive me arsimin, shëndetësinë dhe administratën, duke punuar sipas tij me mençuri për të sanuar pasojat e dëmshme nga periudha e kaluar.

Duke krahasuar parametrat ekonomikë, kryeministri tha se në periudhën e qeverisjes së LSDM-së dhe BDI-së rritja e Bruto-prodhimit vendor ishte pak nën 1,8 për qind, ndërsa në shtatë tremujorët e qeverisë aktuale, që e udhëheq VMRO-DPMNE dhe koalicioni, ajo është pothuajse dyfish më e lartë, përkatësisht 3,5 për qind.

Nga ana tjetër, pas rritjes së çmimit të derivateve të naftës në bursat botërore, përkatësisht prej rreth 5 deri në 6 për qind për naftën dhe prej 2 deri në 3 për qind për benzinën, kryeministri pret që kjo rritje të ndikojë edhe në vend. Sipas pritjeve të tij, nga nesër do të ketë një rritje të re të çmimeve. Çmimi i naftës dizel mund të rritet për rreth 2 deri në 2,5 denarë për litër, ndërsa benzina për rreth një denar. Megjithatë, ai theksoi se duhet të priten llogaritjet përfundimtare, të cilat do t'i bëjë të ditura Komisioni Rregullator për Energjetë gjatë ditës së nesërme.

"Edhe me këtë rritje, mbetemi bindshëm ndër vendet me çmimet më të ulëta të naftës dizel dhe benzinës", tha Mickoski, duke shtuar se vendimi përfundimtar për çmimet e reja me pakicë duhet ta marrë Komisioni Rregullator për Energjetikë, pas së cilës çmimet e reja do të hyjnë në fuqi.

Burim: TV21, Zhurma — Redaksia ZHURMA