Pse rritet çmimi i ulët të grurit në Kosovë?

Bujqit në Kosovë po ankohen për çmimin e ulët të grurit. Bujku Valon Mehapi nga fshati Suhodoll i Lipjanit ka mbjellur 120 hektarë grurë këtë vit. Në disa rajone të Kosovës, korrje-shirjet tashmë kanë filluar, ndërsa në disa pjesë do të nevojiten edhe pak ditë.

Mehapi tregon se po i përcjell parcelat me profesorin Imer Rusinovci, i cili i këshillon se kur duhet të fillojë korrja për të shmangur problemet e lagështisë. Ai shprehet se këtë vit hektoliti i grurit është më i mirë se ai i vitit të kaluar, për shkak të kushteve klimatike, dhe gruri është shumë më i mirë se i viteve të tjera.

Përkundër kësaj, Mehapi thotë se është përballuar me shumë sfida, duke përfshirë çmimin e ulët të shitjes. "Është e turpshme me çfarë gjendje ka ardhur gjendja e bujkut, me çfarë çmime të larta e kemi mbjellë, me çfarë çmime të larta kemi ardhur deri këtu, edhe mos me mundur me i marrë paratë të cilat i ke investuar. Do të thotë ki me marrë më pak se sa që i ke investuar. Ku do të shkojmë kështu dhe ku do të dalim kështu si shoqëri? Unë nuk po mundem me kuptu", thotë ai.

Profesori Imer Rusinovci, i cili merret me bujqësi, sugjeron qeverisë së Kosovës ta përkrahë maksimalisht grurin, duke e konsideruar si kulturë strategjike. Ai thotë: "I sugjeroj Qeverisë së Kosovës, përkatësisht dikasterit përkatës, që kjo kulturë, që është gruri, pra kulturë strategjike, që nuk diskutohet roli, rëndësia dhe fundamenti i saj, të përkrahet maksimalisht, sidomos edhe për produktivitet, sepse mendoj një herë e përgjithmonë që duhet të dallohet si prodhim strategjik në raport me kulturat e tjera që karakterizohen me përfitime të larta materiale".

Rusinovci tregon se këtë vit prodhimtaria pritet të jetë më e lartë se ajo e vitit të kaluar. "Pres një prodhimtari goxha të mirë të këtij viti. Mund të jetë diçka më e lartë se sa vitin e kaluar, por në veçanti për peshën hektolitare ose për randamentin e miellit, sepse të gjitha mostrat që i kemi realizuar këto tri-katër ditë që ka filluar, do të thotë në Prizren dhe Suharekë, po përkojnë me standardin që duhet të jetë për industrinë e bluarjes. Por, si sasi e përgjithshme e grurit që do ta kemi në Kosovë nga këto ngastra kultivuese, do të jetë sërish e pamjaftueshme për t'i plotësuar kërkesat tona", vlerëson ai.

Përgjatë këtyre ditëve, Rusinovci theksoi se në gjithë Kosovën do të mund të fillojë edhe korrja e grurit, pasi ka arritur standardi që duhet ta ketë gruri për deponim.

Burim: Gazeta Metro, https://gazetametro.net/bujqit-ankohen-per-cmimin-e-ulet-te-grurit-kete-vit-pritet-prodhimtari-me-e-larte/

— Redaksia ZHURMA