Sa të larta do të jenë rendimentet e grurit në Kosovë këtë vit?
Pse fermerët shpresojnë për rezultate cilësore, por shqetësohen për çmimet e ulëta në treg?
PRISHTINË — Përgatitjet për korrjen e grurit në Kosovë po zhvillohen me ritme intensive, me synimin për të arritur rezultate optimale në cilësi dhe sasi. Fermerët dhe ekspertët theksojnë se sezoni i korrjeve është thelbësor jo vetëm për bujqësinë, por edhe për sigurinë ushqimore dhe zhvillimin ekonomik të vendit.
Valon Vehapi, fermer, tregon se autokombajnët po përgatiten me kohë për të shmangur problemet gjatë korrjes. "Tash fillon përgatitja e autokombajnave që të mos kemi telashe kur të hyjnë në parcela," thotë ai, duke theksuar rëndësinë e mirëmbajtjes së makinerive për të mos humbur grurë në fusha.
Imer Rusinovci, ekspert bujqësor, shpjegon se gruri në rajonin e Lipjanit ndodhet në fazën e parë të pjekurisë dhe pritet të jetë gati për korrje brenda 15-18 ditëve. "Aktualisht jemi në përcjellje të nënfazës së parë të pjekurisë qumështore, pastaj do të vijë ajo dyllore dhe më pas pjekuria e plotë," thotë Rusinovci për RTK.
Megjithatë, fermerët shprehen shqetësim për çmimet e ulëta të grurit në treg, të cilat nuk mbulojnë koston e prodhimit. "Nëse dalin me ato çmime, ne nuk kemi mundësi kurrsesi ta mbulojmë koston e prodhimit," thotë Vehapi, duke kërkuar ndërhyrje shtetërore për të mbështetur sektorin.
Rusinovci shton se çmimet e grurit përcaktohen nga tregu ndërkombëtar, por shteti duhet të ndihmojë fermerët për të rtitur prodhimin për njësi sipërfaqësore. "Dora e shtetit duhet të ndihet më shumë për të ndihmuar fermerët," thotë ai, duke sugjeruar fokusim në kulturat strategjike me përfitime më të mëdha.
Burim: Telegrafi
— Redaksia ZHURMA