Deponia pa licencë e Pejës rehabilitohet me 14 milionë euro
Bashkimi Evropian dhuron 9 milionë euro, ndërsa pjesa tjetër ndahet mes komunës së Pejës dhe KMDK-së për të përmbushur standardet mjedisore.
PEJË — Rehabilitimi i deponisë ekzistuese në Pejë pritet të fillojë në pjesën e parë të vitit 2027, pasi janë siguruar 14 milionë euro. Ky projekt financohet nga një donacion prej nëntë milionë eurosh nga Bashkimi Evropian, tri milionë euro nga komuna e Pejës dhe dy milionë nga KMDK-ja.
Kryeshefi ekzekutiv i Kompanisë për Menaxhimin e Deponive të Kosovës (KMDK), Dardan Velija, deklaroi se ky projekt nuk parasheh ndërtimin e një deponie të re. Qëllimi kryesor është rikthimi në funksion sipas standardeve të Bashkimit Evropian i deponisë aktuale, e cila prej vitesh operon jashtë kapaciteteve dhe jetëgjatësisë së planifikuar.
KMDK-ja tashmë ka përfunduar studimin e fizibilitetit dhe ka siguruar lejet e licencat në nivelin lokal e qendror. Aktualisht po zhvillohet procesi i shpronësimit të parcelave përkatëse, pasi deponia ka operuar për një kohë shumë të gjatë në prona që nuk kanë qenë nën zotërimin e saj.
Qeliza ekzistuese ku po deponohen mbeturinat ka kohë që ka humbur licencat shtetërore për shkak të tejkalimit të vëllimit dhe jetëgjatësisë së planifikuar. Velija shtoi se pritet që kjo hapësirë të kalojë plotësisht nën menaxhimin e KMDK-së gjatë vitit të ardhshëm për të përgatitur fillimin e punimeve.
Paralelisht, po planifikohen edhe kapacitetet afatgjata mbi bazën e sasisë aktuale të mbeturinave që gjenerohen. Në të ardhmen pritet reduktimi i tyre përmes zgjerimit të infrastrukturës mjedisore, duke përfshirë impiantet e ndarjes dhe trajtimin e mbeturinave organike, të cilat mbeten fraksioni më problematik.
Strategjia e re për menaxhimin e mbeturinave obligon komunat që të fillojnë ndarjen në burim. Ndonëse ngritja e vetëdijes qytetare kërkon kohë për t'u krijuar, Velija theksoi se ky proces dhe ndërtimi i infrastrukturës së nevojshme duhet të pasojnë dhe të zhvillohen paralelisht në të ardhmen.
Tash për tash, prioriteti më i rëndësishëm mbetet rehabilitimi i deponive ekzistuese për t'i sjellë ato në standarde të pranueshme evropiane. Ky hap do të sigurojë që mbeturinat e gjeneruara të kenë një vendtrajtim të sigurt, përpara se të fillojë zbatimi i masave të tjera të planifikuara afatgjata.
Burim: Ekonomia Online
— Redaksia ZHURMA