Qeveria krijon regjistër kombëtar për kanabisin — kontroll, jo legalizim

TIRANË — Këshilli i Ministrave miratoi krijimin e "Regjistrit Kombëtar të Aktivitetit të Licencuar dhe të Lejuar të Bimës së Cannabis-it", një regjistër elektronik që do të mbajë kryesisht në mënyrë automatike të dhënat për licencat, lejet, autorizimet, gjurmimet, kontrollet dhe gjobat lidhur me kultivimin dhe përpunimin e kanabisit për qëllime mjekësore dhe industriale.

Regjistrin e administron Agjencia Kombëtare e Kontrollit të Cannabis-it, e cila bashkëpunon me Agjencinë Kombëtare të Shoqërisë së Informacionit për hostimin dhe asistencën teknike. Nëse konstaton se të dhënat e hedhura nga subjektet janë të pasakta ose përbëjnë shkelje, Agjencia mund të marrë masa, nga korrigjimi i të dhënave deri te gjoba.

Vendimi nuk lidhet me legalizimin e kanabisit, por me kontrollin dhe monitorimin e çdo aktiviteti të lidhur me bimën për qëllime mjekësore dhe industriale. Platforma do të lehtësojë aplikimet përmes portalit qeveritar "e-Albania" dhe do të shkëmbejë automatikisht të dhëna me sistemet kryesore shtetërore, përfshirë sistemin e gjurmueshmërisë dhe atë tatimor.

Vendimi mbështetet në nenin 100 të Kushtetutës, në ligjin nr.61/2023 "Për kontrollin e kultivimit të bimës së cannabis-it dhe prodhimit të nënprodukteve të saj për qëllime mjekësore dhe industriale", si dhe në ligjin nr.10325, datë 23.9.2010, "Për bazën e të dhënave shtetërore". Propozimi erdhi nga ministrat e Shëndetësisë, Bujqësisë dhe Punëve të Brendshme.

Në regjistër do të kenë akses ministritë e Shëndetësisë dhe Bujqësisë, Agjencia Kombëtare e Kontrollit të Cannabis-it, Autoriteti Kombëtar i Ushqimit, administratat doganore e tatimore, Policia e Shtetit, si dhe vetë subjektet e licencuara, secili sipas nivelit të tij — administrator, regjistrues ose shikues.

Regjistruesi mund të korrigjojë ose të fshijë të dhëna të hedhura gabimisht brenda 24 orëve nga hedhja e tyre; pas këtij afati, ndryshimi bëhet vetëm nga administratori. Agjencia aktivizon aksesin e një punonjësi të ri brenda 5 ditëve pune nga njoftimi, ndërsa ia heq brenda 1 dite pune kur punonjësi largohet nga institucioni.

Çdo veprim i kryer në regjistër regjistrohet automatikisht në regjistra (log-e) të auditueshëm e të pamodifikueshëm, duke përfshirë kredencialet, kohën, vendndodhjen dhe veprimin e kryer. Vendimi thekson qartë se qëllimi mbetet kontrolli e gjurmueshmëria e plotë e kanabisit të licencuar — jo hapja e rrugës për legalizimin e tij.

Burim: Shqiptarja
— Redaksia ZHURMA