Osman Stafa: Më morën telefonin, më kapën nga krahët dhe më kërcënuan me arrestim

Gazetari i News24, Osman Stafa, denoncon se punonjës të Policisë së Shtetit e ndaluan të filmonte, i morën telefonin dhe e mbajtën të ndaluar për më shumë se 10 minuta, duke e kërcënuar me arrestim. Ndodhi pranë Piramidës në Tiranë, ndërsa Stafa regjistroi vendosjen e një gjobe ndaj një qytetareje.

Sipas Stafës, një punonjës policie e pyeti pse po filmonte, duke pretenduar se nuk lejohej filmimi i një punonjësi policie. Stafa u përgjigj se, si gazetar, ka të drejtë të dokumentojë veprimet e policisë në hapësira publike. Pas kërcënimeve për shoqërim në komisariat, ai ndezi telefonin për të regjistruar situatën, por u rrethua nga civilë që e kapën nga krahët, ia vunë duart pas shpine dhe i morën pajisjen. Stafa pretendon se katër deri në pesë persona u përpoqën ta ulnin në tokë, ndërsa i përsërisnin se do ta shoqëronin në komisariat dhe se mund ta kalonte natën në qeli.

Policia u largua vetëm pasi u njoftuan eprorët dhe u informuan për ngjarjen. Stafa e përshkruan rastin si një kërcënim dhe intimidim të drejtpërdrejtë, duke kundërshtuar faktin se iu ndërpre filmimi dhe nuk u lejua të lëvizte.