Raporti i Progresit: Ngecje në energji dhe investime publike

Raporti i Progresit për Kosovën, që do të miratohet të mërkurën më 4 nëntor, pasqyron ndikimin e paralizës së zgjatur institucionale në ngecjen e reformave kyçe dhe procesin e integrimit. Sipas draftit të siguruar nga gazetari Augustin Palokaj, Komisioni Evropian ka konstatuar mungesë të progresit të duhur në fushën e sundimit të ligjit dhe reforma urgjente në investimet publike.

Vitet e kaluara janë karakterizuar nga sfidat e vazhdueshme në institucione, ku mungesa e një kuvendi funksional dhe vonesat në formimin e qeverisë kanë ngadalësuar zbatimin e reformave të identifikuara nga Komisioni Evropian që nga raporti i para një viti. Paraliza institucionale ka lënë pasoja të rënda në funksionimin e institucioneve demokratike dhe në mbikëqyrjen legjislative të vendit.

Sipas draftit të raportit, ekziston një gjendje shqetësuese në sektorin e energjisë, ku përkundër përpjekjeve për të diversifikuar furnizimin dhe për të përmirësuar efikasitetin, sektori energjetik mbetet pengesë e madhe për zhvillimin ekonomik në Kosovë. Në fushën e ekonomisë dhe tregtisë, Komisioni Evropian ka vërejtur se nuk ka pasur fare progres në lirinë e lëvizjes së mallrave dhe punëtorëve, si dhe as në politikën e konkurrencës, megjithëse është shënuar një lloj progresi në lirinë e lëvizjes së kapitalit.

Lidhur me luftën kundër korrupsionit, drafti tregon se ka pasur vetëm progres të limituar, ndërsa në luftën kundër krimit të organizuar vërehet një lloj progresi. Pjesë e konsiderueshme e dokumentit i kushtohet procesit të normalizimit të raporteve me Serbinë, ku të dyja vendet qortohen për mungesë të zbatimit të obligimeve nga dialogu. Sipas gjetjeve, Kosova kritikohet për veprime të njëanshme dhe të pakoordinuara që kanë të bëjnë me mbylljen e strukturave të shtetit të Serbisë, si dhe për mosnisjen e procedurave për themelimin e Asociacionit të komunave me shumicë serbe. Për urën mbi lumin Ibër, vlerësohet se ajo duhet të hapet, por kërkohet një koordinim më i mirë ndërmjet komunave dhe institucioneve qendrore, kurse për strukturat e mbështetura nga Serbia theksohet se ato duhet të trajtohen në bazë të ligjit të Kosovës dhe marrëveshjeve të dialogut, përmes konsultimeve të strukturuara dhe bashkëpunimit me Përfaqësuesin Special të Bashkimit Evropian.

Në ditët në vijim pritet miratimi zyrtar i Raportit të Progresit, ndërsa institucionet e Kosovës dhe Serbia pritet të angazhohen në mënyrë konstruktive dhe pa vonesa në përmbushjen e obligimeve nga marrëveshjet e Brukselit dhe e Ohrit.