Raporti i autopsisë konfirmon se Daveigh Chase vuante nga AIDS-i

Është publikuar raporti i detajuar i autopsisë së aktores amerikane Daveigh Chase, e cila u bë e njohur për rolet e saj në kinematografi me filmat “Lilo & Stitch”, “Donnie Darko” dhe “The Ring”. Sipas të dhënave të Zyrës së Mjekësisë Ligjore në Los Angeles, aktorja 35-vjeçare vuante nga AIDS-i në fazë të avancuar dhe të patrajtuar, ndërsa në organizmin e saj u gjetën edhe substanca narkotike si metamfetamina dhe fentani.

Aktorja ishte gjetur më 4 qershor në ulësen e pasme të një veture dhe ishte ankuar për dhimbje koke, dobësi e hutim, përpara se të dërgohej në spital ku mjekët i konstatuan infeksione dhe HIV-in. Pavarësisht trajtimit, gjendja e saj u përkeqësuar deri në vdekjen më 16 qershor në Los Angeles, ku si shkak zyrtar u caktua sindroma e imunodeficiencës së fituar, ndërsa faktor kontribues ishte përdorimi kronik i substancave psikoaktive.

Pas vdekjes së aktores, një person i quajtur Roy Hernandez hapi një fushatë në GoFundMe duke u prezantuar si i dashuri i saj, mirëpo ish-menaxheri i saj shumëvjeçar, John Ryan, kërkoi nga publiku të mos kontribuonte pasi as familja dhe as miqtë nuk e njihnin atë person. Ryan theksoi se ajo kishte një fond përmes Shoqatës së Aktorëve të Filmit dhe pretendoi se ajo kishte miliona dollarë të ardhura të papaguara nga projektet e kaluara.