Pse Rami Mislimi kërkon që tetovarët të çohen kundër Bilall Kasamit?
Rami Mislimi akuzon kryetarin e Tetovës për shitje të tokave dhe orientime të gabuara gjeopolitike, duke thirrur qytetarët në reagim.
TETOVË — Rami Mislimi ka reaguar ashpër përmes një postimi në rrjetet sociale, duke komentuar deklaratat e fundit që ndërlidhen me kryetarin e Komunës së Tetovës, Bilall Kasami, dhe raportet e tij me Shqipërinë. Mislimi ka theksuar se nëse pretendimet për ndikimin e Kasamit janë të vërteta, ky nuk është një zhvillim i thjeshtë.
Ai vlerëson se përmendja publike e kësaj çështjeje nga kryeministri shqiptar Edi Rama nuk është e rastësishme. Për Mislimin, ky fakt përbën një sinjal të errët për Tetovën dhe për raportet mes shqiptarëve. Ai ka shtuar se tetovarët historikisht kanë qenë të lidhur me Shqipërinë dhe me botën perëndimore.
Sipas tij, Tetova dhe qytetarët e saj nuk mund të mbështesin politika që krijojnë përçarje apo që çojnë në orientime të gabuara gjeopolitike. "Tetova nuk reshtohet me Iranin, por me Shqipërinë dhe Amerikën", ka shkruar Mislimi, duke kundërshtuar hapur çdo qasje që tenton të largojë qytetin nga lidhjet e tij tradicionale me Perëndimin.
Në reagimin e tij, Mislimi ka ngritur edhe akuzën për shitjen e tokave në Tetovë nga Bilall Kasami. Ai u ka bërë thirrje tetovarëve të çohen në këmbë kundër kryetarit për këtë çështje, nëse ai vërtet ka çuar qytetarët kundër Shqipërisë. Deri më tani, Kasami nuk ka reaguar ndaj këtyre akuzave.
Burim: Tetova Sot
— Redaksia ZHURMA