Rama: Propozimi për operën po bëhet aty ku bllokohet kryeqyteti

Kryetari i Prishtinës, Përparim Rama, ka reaguar ndaj Ministres së Kulturës dhe Turizmit, Saranda Bogujevci, lidhur me vendndodhjen e projektit të Teatrit të Operës dhe Baletit në hapësirën ku është bllokuar projekti i kryeqytetit Ishulli Urban, i cili synon të lidhë 30.000 banorë me qendrën e qytetit.

Ndërtimi i projektit Ishulli Urban, i cili do të lidhte lagjen Arbëria me Pallatin e Rinisë dhe Sporteve, ndodhet i bllokuar prej më shumë se dy vitesh për shkak të përfshirjes së asaj hapësire në zonën e mbrojtur të Qendrës Historike të Prishtinës. Më herët, që në vitin 2022, vetë Komuna e Prishtinës i kishte ndarë ato parcela për ndërtimin e Teatrit të Operës dhe Baletit. Megjithëse punimet për teatrin ishin premtuar të nisnin në fund të këtij viti, procedurat për ndërtim do të hapen vetëm pas përfundimit të projektit zbatues.

Ministrja e Kulturës dhe Turizmit, Saranda Bogujevci, njoftoi se projekti i hartuar nga studioja daneze BIG nën udhëheqjen e arkitektit Bjarke Ingels është drejt finalizimit. Sipas saj, ky objekt do të përmbajë katër salla për shfaqje artistike, hapësira për prova, si dhe ambiente për konferenca, edukim dhe aktivitete publike. Menjëherë pas këtij njoftimi ka reaguar kryetari Përparim Rama, i cili u shpreh me ironi për pretendimet e mëparshme për trashëgiminë kulturore në atë zonë. Rama deklaroi se propozimi po bëhet pa bashkëpunim dhe pa planifikim të përbashkët me pushtetin local, ndërsa kritikoi ministrinë edhe për mbylljen prej pesë vitesh të Teatrit Kombëtar dhe Muzeut Kombëtar të Kosovës.

Pas përfundimit të projektit zbatues nga studioja projektuese, Ministria e Kulturës dhe Turizmit pritet të nisë procedurat e prokurimit për ndërtimin e objektit. Nga ana tjetër, Komuna e Prishtinës i ka bërë thirrje ministrisë për bashkëpunim dhe koordinim në çdo hap për ndarjen e hapësirës dhe angazhimin e ekspertëve.

Saranda Bogujevci ka deklaruar se «Sot u njoftuam nga ekipi projektues për ecurinë e projektit të Teatrit të Operës dhe Baletit, një prej investimeve më të rëndësishme infrastrukturore për kulturën në Kosovë, që do të ndikojë në zhvillimin e institucioneve tona të arteve muzikore dhe skenike për dekadat që vijnë. Kosova po bën hapa konkretë drejt krijimit të një shtëpie të re për institucionet kulturore skenike dhe artistët skenikë».

Përparim Rama ka reaguar publikisht duke thënë se «Tash nuk paska trashëgimi kulturore!». Ai ka vazhduar me pyetjen «A nuk ka trashëgimi kulturore tash aty ku po e bllokoni ‘Ishullin Urban’, projekt që lidh 30.000 banorë me qendrën? Apo nuk përbën problem, kur ju duhet me paraqit një projekt kuturu, veç sa me thënë se po bëni diçka, pas vdekjes klinike të institucioneve kulturore prej se keni ardhë në pushtet?». I njëjti ka shtuar se «Prandaj, ejani të bashkëpunojmë që Opera potencialisht të bëhet. Ne jemi të gatshëm ta ndajmë hapësirën, t’i angazhojmë ekspertët më të mirë që kemi dhe t’ju ndihmojmë të koordinohemi në çdo hap. Që në fund të fitojnë qytetarët dhe artistët ta kenë shtëpinë që e meritojnë».