Pse Rama i quan 4.67 mln euro 'reagim të vonuar' të Kurtit?
Çfarë thotë kryetari i Prishtinës për menaxhimin e autostradave pas aksidentit tragjik që la një të vdekur?
PRISHTINË — Kryetari i Prishtinës, Përparim Rama, ka lidhur njoftimin e Ministrisë së Infrastrukturës për 4.67 milionë euro investime në Autostradën Ibrahim Rugova me aksidentin tragjik të së shtunës, ku humbi jetën një grua dhe një tjetër u lëndua rëndë.
"Dje Kosova u zgjua me lajmin tragjik të humbjes së jetëve. Sot u zgjua me lajmin se heqja e atij dheu do t'u kushtojë qytetarëve 4.67 milionë euro", ka shkruar Rama në rrjetet sociale.
Ai ka kritikuar se për vite me radhë nuk janë ndërmarrë veprime për largimin e dheut dhe sanimin e zonave problematike, ndërsa tani po ndahen miliona për ndërhyrje emergjente. "Kjo është fotografia më e qartë e një qeverisieje që reagon vetëm kur është tepër vonë", ka theksuar ai.
Rama i ka drejtuar kritika edhe kryeministrit në detyrë Albin Kurti, duke thënë se qeveria aktuale ka trashëguar autostrada të ndërtuara, por nuk po arrin t'i mirëmbajë. "Shtetin e gjete me autostrada të ndërtuara, ndërsa sot nuk arrin as t'i mirëmbash. Për çdo dështim fajin e ka e kaluara, ndërsa për çdo propagandë meritat i merr vetë", ka deklaruar ai.
Ministria e Infrastrukturës ka njoftuar se kontratat përfshijnë sanimin e rrëshqitjeve në kilometrat 72.4 (2.09 milionë euro), 69.1 dhe 63.4 (1.19 milionë euro), dhe 44.0 (1.40 milionë euro), me operatorët që do të mobilizohen ditët në vijim.
Burim: Telegrafi, https://telegrafi.com/rama-qeverise-kurti-autostradat-i-gjetet-te-ndertuara-nuk-po-arrini-ti-mirembani/
— Redaksia ZHURMA