Rama: Komisioni Europian rekomandoi nisjen e përgatitjeve për traktatin e anëtarësimit

Kryeministri Edi Rama deklaroi se Komisioni Europian i ka rekomanduar Këshillit Europian të nisë gjatë vitit 2027 përgatitjet për hartimin e traktatit të anëtarësimit të Shqipërisë në Bashkimin Europian. Këto deklarata Rama i bëri gjatë fjalës së tij në mbledhjen e Asamblesë Kombëtare të Partisë Socialiste, duke e cilësuar këtë rekomandim si një moment historik për vendin.

Procesi i integrimit europian të Shqipërisë ka kaluar nëpër reforma të shumta ndër vite. Me marrjen e pushtetit nga Partia Socialiste në vitin 2013, qeveria nisi reformën në energji dhe më pas atë në drejtësi, të cilat u shoqëruan me përplasje politike dhe përpjekje për përballjen me dështimet e mëparshme dhe kërcënimin e kolapsit financiar.

Gjatë mbledhjes së Asamblesë Kombëtare të PS-së, kreu i qeverisë tha se politika duhet të ngrihet mbi valët e zhurmave dhe se Partia Socialiste duhet të ushtrojë përgjegjësinë e drejtimit pa humbur kthjellësinë. Rama po ashtu pretendon se vendi po përballet me një presion të brendshëm përmes instrumentalizimit politik të një proteste dhe se ka pasur një ofensivë dhune kundër qeverisë. Sipas kryeministrit, formulimi për nisjen e përgatitjeve të traktatit të anëtarësimit shfaqet për herë të parë në raportin e KE-së dhe nuk ka marrë vëmendjen e duhur.

Sipas raportit të fundit të Komisionit Europian për zgjerimin, përgatitjet për hartimin e dokumentit të anëtarësimit parashikohet të nisin gjatë vitit 2027. Rama theksoi se vendi ndodhet në pikën e tij më të lartë drejt bashkimit përfundimtar me shoqëritë europiane dhe kërkoi mbledhjen e të gjitha energjive dhe vullneteve për të realizuar këtë objektiv.

“Në raport, KE ka shkruar një frazë që ka një rëndësi domethënëse për ecurinë e vendit në kushtet kur vendi po jeton një presion të brendshëm përmes instrumentalizimit politik të një proteste të nisur për arsye krejt të tjera dhe të degraduar në një ofensivë dhune kundër qeverisë në dukje, por ne fakt kundër mënyrës se si ne duam që Shqipëria të shkojë përpara”, u shpreh kryeministri Rama.