Rama: Deputeti Kërçeli po e mashtron opinionin për çmimin e shiritit në Prishtinë

Kryetari i Komunës së Prishtinës, Përparim Rama, deklaroi se deputeti i Lëvizjes Vetëvendosje, Ilir Kërçeli, po e mashtron opinionin publik kur e paraqet çmimin e një shërbimi të tërë si kosto vetëm të një shiriti. Përmes një reagimi, Rama sqaroi se vlera prej 8.50 eurosh për metër me TVSH mbulon një sërë shërbimesh inxhinierike dhe garanci dhjetëvjeçare në kryeqytet.

Reagimi i kryetarit erdhi pasi deputeti i Lëvizjes Vetëvendosje ngriti pretendime për keqpërdorime me prokurimin e shiritit nga Komuna e Prishtinës. Rama e cilësoi këtë deklaratë si shfaqje të radhës politike dhe paralajmëroi se do të ndjekë rrugën ligjore për secilën shpifje që bëhet ndaj tij, pas deklaratave të tij të mëparshme për Kryeministrin.

Përparim Rama sqaroi se kostoja prej 8.50 eurosh për metër përfshin furnizimin me material, transportin, punën e punonjësve të kompanisë dhe shtrirjen e shiritit në kanalin përkatës nga staf kompetent. Po ashtu, sipas kryetarit të Prishtinës, kjo shumë mbulon garancinë për 10 vjet sipas kushteve të kontratës, mirëmbajtjen 10-vjeçare pa kosto shtesë sipas nevojës, si dhe Tatimin mbi Vlerën e Shtuar. Ai nënvizoi se shiriti nëntokësor vjen për të paralajmëruar praninë e kabllove elektrike dhe mbrojtur punëtorët nga dëmtimet gjatë gërmimeve të ardhshme nga Ujësjellësi, KEDS-i, Termokosi apo kompani të tjera.

Rama bëri me dije se kjo procedurë tenderuese është trajtuar nga Organi Shqyrtues i Prokurimit, Komisioni Rregullativ i Prokurimit Publik, auditorët e brendshëm, auditorët e jashtëm si dhe hetuesia. I pari i Prishtinës i propozoi deputetit Kërçeli që para se të dalë në shfaqje televizive t'i marrë informacionet bazë, ta lexojë e ta kuptojë kontratën mirë para se të dalë para qytetarëve.