Rama: Fushata kundër meje ka kaluar nga sulmet politike në sulme personale
Kryetari i Prishtinës paralajmëron se rasti do të ndiqet deri në instancat më të larta të drejtësisë.
PRISHTINË — Kryetari i Prishtinës, Përparim Rama, ka reaguar pas publikimit të pretendimeve të fundit që lidhen me të dhe bashkëpunëtorët e tij, duke thënë se fushata ndaj tij ka kaluar nga sulmet politike në sulme personale ndaj familjes së tij. Përmes një reagimi publik, Rama tha se prej një kohe është përballur me një “fushatë të orkestruar politike” që, sipas tij, synon ta intimidojë dhe diskreditojë, ndërsa shtoi se ditët e fundit në shënjestër kanë qenë edhe bashkëpunëtorët dhe bashkëshortja e tij.
Ai theksoi: “Kur një betejë politike zbret në shpifje, fyerje dhe denigrim të familjarëve e njerëzve që nuk janë pjesë e përplasjes politike, nuk kemi më debat demokratik dhe as llogaridhënie. Kemi një përpjekje të vetëdijshme për të frikësuar, për të ushtruar presion dhe për të goditur përmes njerëzve më të afërt”. Rama mirëprit trajtimin e çdo pretendimi për interes publik nga institucionet e drejtësisë, por kundërshtoi përdorimin e gjuhës së urrejtjes dhe denigrimit nën arsyetimin e kësaj kampanje, duke shtuar: “Po të ishte vërtet ky qëllimi, njerëzit që nuk kanë asnjë lidhje me pretendimet e ngritura nuk do të ishin bërë pjesë e një sulmi kaq të ulët dhe kaq të neveritshëm”.
Kryetari ka reaguar edhe ndaj asaj që, sipas tij, kjo çështje është përdorur si instrument politik në mbledhjen e Asamblesë së Kryeqytetit, duke e cilësuar këtë si dëshmi të degradimit të debatit publik dhe paralajmëruar se rasti do të ndiqet deri në instancat më të larta të drejtësisë. Në fund të reagimit, Rama ka deklaruar se kushdo që ka marrë pjesë në organizimin, nxitjen apo përhapjen e kësaj fushate do të mbajë përgjegjësi para drejtësisë: “Shteti ligjor nuk mund të lejojë që linçimi dhe denigrimi të përdoren si instrumente të veprimit politik. Kjo nuk është më politikë. Është çnjerëzore!”.
Ky reagim vjen pas qarkullimit të disa materialesh në të cilat pretendohet për përfshirje në një aferë të dyshuar korrupsioni të Florent Maliqit, shefit të kabinetit të Ramës. Autenticiteti i këtyre komunikimeve nuk është konfirmuar dhe pretendimet nuk janë verifikuar ende në mënyrë të pavarur nga organet e drejtësisë. Ndërkaq, të shtunën (01.08.2026), Maliqi, përmes një deklarate për media të lëshuar nga zëdhënësja e Kryeqytetit, i ka mohuar akuzat për korrupsion që janë ngritur ndaj tij, duke i cilësuar ato si të pavërteta dhe pjesë e një fushate denigruese. Për këtë ka reaguar edhe kryetari Përparim Rama, i cili tha se e mirëpret faktin që çështja i është drejtuar Prokurorisë, duke shtuar se institucionet komunale do të bashkëpunojnë plotësisht me organet e drejtësisë.
Burim: Kallxo
— Redaksia ZHURMA