Pse i refuzon Radev takimin Mickoskit?

SOFJE — Presidenti i Bullgarisë, Rumen Radev, ka akuzuar autoritetet e Shkupit se po mbjellin gjuhë urrejtjeje, po tregojnë intolerancë dhe po e përdorin historinë si mjet në marrëdhëniet ndërkombëtare. Udhëheqja politike, tha ai, po vepron me kokëfortësi kundër interesit të qytetarëve të vet për integrim më të shpejtë evropian.

Pyetur për mundësinë e një takimi me kryeministrin Hristijan Mickoski, Radev ishte i prerë: "Nuk ka vend për një takim të tillë sepse problemi nuk është dypalësh. Mickoski ka problem me Bashkimin Evropian." Maqedonia e Veriut, shtoi ai, do të duhet ta bindë BE-në se garanton sigurinë e misioneve diplomatike në territorin e saj.

Radev rikujtoi rolin e Bullgarisë në procesin e integrimit: "Atëherë isha i vetëm kundër të gjithëve. Arrita t'i bind të gjithë liderët evropianë" për përfshirjen e bullgarëve në Kushtetutën e Maqedonisë së Veriut dhe zbatimin e Marrëveshjes për Fqinjësi të Mirë, veçanërisht protokollit të dytë.

Presidenti bullgar tha se ka vërejtur luhatje në qëndrimet e disa liderëve evropianë — të vërejtura edhe gjatë Samitit BE-Ballkani Perëndimor në Mal të Zi. "Konsensusi i arritur në korrik të vitit 2022 duhet të respektohet. Dikush nuk e ka bërë punën e vet. Dhe këtë do ta bëj", deklaroi Radev.

I pyetur edhe për djegien e dy automjeteve diplomatike para Ambasadës së Bullgarisë në Shkup, Radev tha se problemi më i madh është se incidente të tilla jo vetëm që nuk dënohen nga udhëheqja aktuale, por edhe nxiten dhe përdoren gjatë fushatave zgjedhore.

Burim: Tetova Sot
— Redaksia ZHURMA