QKUK i la pa ecje 800 kosovarë, 6 vjet në pritje për protezë gjuri

PRISHTINË — Një 52-vjeçare nuk ecën dot pa paterica. Tre vjet që nga 2023-a pret thirrjen nga QKUK-ja për të vendosur protezë në gju, ndërhyrje që në privat kushton mijëra euro.

Të tjerë presin më gjatë akoma. Listat e pritjes për proteza gjuri shkojnë deri në 6 vjet — pacientët e lajmëruar në 2020 ende nuk janë operuar. Ortopedia, e vetmja qendër që realizon këto ndërhyrje, i ka ndërprerë krejt operacionet që nga fundi i vitit të kaluar.

Shkaku: mungesa e materialit. Një tender gati 8 milionë euro, me kontratë 3-vjeçare për furnizim, ende nuk ka marrë epilog. Listat veç sa janë shtuar — afro 800 veta kanë caktuar termin vetëm në 2025, plus mbi 100 të tjerë në 6 mujorin e parë të 2026-s.

Decentralizimi në spitalet e përgjithshme paraqitet si zgjidhje e vetme për të zvogëluar pritjet. Synohet që aty të kalojnë edhe protezat e kërdhokullës dhe operacionet e ligamenteve — por pa material, asnjë spital nuk operon dot.

Burim: Klan Kosova, https://klankosova.tv/protezat-e-gjurit-6-vjet-pritje-ortopedia-ska-material-video/
— Redaksia ZHURMA