Pse Qeveria shtyu afatin e kontratave për stacionet e plazhit?
Bizneset do të lidhin kontratat me shtetin për sezonin turistik deri në fund të qershorit, ndërsa çmimet tavan i kalojnë pushtetit vendor.
TIRANË — Qeveria ka miratuar ndryshime në rregulloren për stacionet e plazhit, duke shtyrë afatin për lidhjen e kontratave të qirasë deri në fund të qershorit për sezonin turistik të këtij viti. Çdo ndryshim në kontratat ekzistuese do të bëhet vetëm me dakordësi të dyanshme, përcakton vendimi.
Sipas rregullores së re, çmimet tavan të stacioneve të plazhit i përcaktojnë këshillat bashkiakë, jo qeveria qendrore. Tarifat do të diferencohen sipas zonave, duke marrë parasysh nivelin e zhvillimit turistik, aksesueshmërinë, intensitetin e kërkesës dhe standardin e shërbimit. Qeveria e justifikoi vendimin si përpjekje për koordinim më të mirë institucional, ulje konfliktesh për hapësirat bregdetare dhe shmangie të abuzimit me çmimet e çadrave dhe shezlongëve.
Stacionet e plazhit lejohen vetëm pranë strukturave akomoduese, me përjashtim të disa plazheve specifike: Divjaka, Spillea, Gjiri i Lalzit, Zvërnec, Lukova dhe Borshi, ku njihet e drejta e stacioneve edhe për subjekte të regjistruara si bare apo restorante. Deri më tani është miratuar vetëm një pjesë e tarifave.
Burim: Telegrafi
— Redaksia ZHURMA