Çfarë sqarimi kërkon Kamberi për fondet e Kosovës për Preshevën?
Deputeti shqiptar në Kuvendin e Serbisë pyet nëse ekziston vendim qeveritar për ndalimin e donacioneve të Këshillit Kombëtar Shqiptar.
Redaksia ZHURMA · · Përditësuar · 1 min lexim
BEOGRAD — Deputeti i vetëm shqiptar në Parlamentin e Serbisë, Shaip Kamberi, i ka kërkuar sqarime kryeministrit serb dhe Guvernatorit të Bankës Popullore për bllokimin e fondeve të ndara nga Qeveria e Kosovës për Luginën e Preshevës.
Në pyetjen e parashtruar në seancën e Kuvendit, Kamberi ka kërkuar të dijë nëse ekziston ndonjë vendim qeveritar, i Bankës Popullore, i Ministrisë së Financave apo i ndonjë organi tjetër që kufizon, ndalon ose bllokon realizimin e donacioneve që Këshilli Kombëtar Shqiptar merr nga buxheti i Kosovës përmes bankave komerciale në Serbi.
Kamberi ka parashtruar katër pyetje specifike: në çfarë baze ligjore është marrë vendimi, cili organ e ka miratuar, a zbatohen masat vetëm ndaj Këshillit Kombëtar Shqiptar apo edhe ndaj këshillave të tjerë të pakicave, dhe a është vendosur Këshilli në ndonjë listë zyrtare kufizimesh.
"Bllokimi afatgjatë i transfereve rrezikon seriozisht realizimin e të drejtave të pakicës kombëtare për vetëqeverisje në fushat e kulturës, arsimit, informimit dhe përdorimit zyrtar të gjuhës", ka thënë Kamberi, duke e quajtur këtë "sulm të drejtpërdrejtë ndaj çështjeve ekzistenciale" të Këshillit Kombëtar.
Burim: Zëri
— Redaksia ZHURMA
