Qeveria vendos shënjimin e karburanteve — tarifa 6.5 euro pa TVSH për 1 000 litra
Kompanitë që importojnë apo tregtojnë karburante do të paguajnë një tarifë prej 6.5 eurosh pa TVSH për 1000 litra, ndërsa realizimi i komponentit teknik i është besuar shoqërisë ALBTrace CO.
TIRANË — Qeveria shqiptare ka miratuar zyrtarisht projektvendimin për vendosjen e shënjimit të detyrueshëm të naftës dhe benzinës që do të hidhet në treg. Ky sistem i integruar ka për qëllim të monitorojë lëvizjen e karburanteve në çdo hallkë të furnizimit, duke synuar garantimin e cilësisë, integritetit dhe luftimin e evazionit fiskal në vend.
Sipas Ministrisë së Financave, i gjithë procesi do të quhet Sistemi i Integritetit të Karburanteve, ndërsa të dhënat e mbledhura do të jenë pronë e autoritetit doganor. Për realizimin e komponentit teknik është angazhuar shoqëria ALBTrace CO, e cila do të paguhet nga kompanitë që importojnë apo tregtojnë karburante me një tarifë prej 6.5 eurosh pa TVSH për 1 000 litra karburant.
Shoqëria e përzgjedhur do të sigurojë pajisjet përkatëse dhe do të mbështesë kontrollet në terren nën mbikëqyrjen e administratës doganore shqiptare. Vendimi i ri ndalon në mënyrë kategorike tregtimin, importimin, transportimin apo magazinimin e çdo karburanti që nuk i është nënshtruar këtij shënjimi dhe nuk është pajisur me certifikatën përkatëse pas kontrollit.
Zbatimi i plotë i këtij regjimi të ri do të nisë pas një faze fillestare implementimi që do të zgjasë deri në gjashtë muaj. Pas përfundimit të këtij afati, asnjë ngarkesë nafte apo benzine nuk do të mund të hidhet më në treg pa u shënjuar sipas rregullave të reja.
Burim: Gazeta Tema
— Redaksia ZHURMA