Qeveria ndan 2 milionë euro për mërgatën dhe olimpiadat e nxënësve
Mjetet do të mbështesin linjat ajrore drejt destinacioneve të mërgatës dhe pjesëmarrjen e nxënësve kosovarë në gara ndërkombëtare në Kinë, SHBA dhe Uzbekistan.
PRISHTINË — Qeveria në detyrë e Republikës së Kosovës ka zhvilluar një mbledhje elektronike në të cilën ka ndarë 2 milionë euro për zbatimin e Masës 4.5 "Mbështetja e Mërgatës" në kuadër të Pakos së Ringjalljes Ekonomike. Këto mjete do të shërbejnë për mbështetjen e linjave ajrore që lidhin Kosovën me destinacionet ku jeton mërgata shqiptare.
Po ashtu, janë ndarë mjete financiare për disa subjekte kërkuese me qëllim të promovimit të Kosovës në aktivitete dhe gara ndërkombëtare. Për Shoqatën e Matematikanëve të Kosovës janë ndarë 8 mijë euro për pjesëmarrjen në Olimpiadën e 67-të të Matematikës 2026, që do të mbahet më 21 korrik në Shangai të Kinës.
Për "Kosova Global Talent Center" janë ndarë 70 mijë e 876 euro e 79 cent për pjesëmarrjen e 26 nxënësve në finalen e "NEO Science Olympiad" në New York të SHBA-së. Shoqata e Kimistëve të Kosovës mori 3 mijë e 500 euro për Olimpiadën Ndërkombëtare të Kimisë 2026 në Tashkent të Uzbekistanit.
Në mbledhje është aprovuar gjithashtu lista e anëtarëve potencialë të Komisionit të Pranimit për Ministrinë e Punëve të Brendshme.
Burim: Zëri
— Redaksia ZHURMA
Bisedoni
Komentet janë të hapura për anëtarët e Zhurma. Llogaria është falas — krijo një ose hyr në llogarinë tënde për me e thanë mendimin.