Qendra në Gjadër mbetet bosh — 138 milionë euro kosto në vit
Projekti i ngritur nga Italia në Lezhë kushton 138 milionë euro në vit, ndërsa qeveria e Giorgia Melonit përballet me pengesa ligjore nga Gjykata e BE-së.
LEZHË — Qendra e emigrantëve e ngritur nga Italia në Gjadër të Lezhës po qëndron pothuajse plotësisht e zbrazët dhe po përballet me pengesa të forta ligjore që kanë bllokuar funksionimin e saj. Marrëveshja mes Shqipërisë dhe Italisë parashikonte që emigrantët e kapur në det të dërgoheshin këtu, por aktualisht ky mekanizëm ka dështuar.
Sipas një raportimi nga gazeta spanjolle El País, zbatimi i këtij modelu të jashtëm po analizohet nga Gjykata e Drejtësisë së Bashkimit Evropian. Gjykata po shqyrton nëse procedurat e azilit dhe ndalimi i emigrantëve jashtë territorit të Bashkimit Evropian janë në përputhje me ligjet evropiane, gjë që ka bllokuar projektin.
Një tjetër problem i madh është kostoja jashtëzakonisht e lartë e kësaj strukture, ku mirëmbajtja e saj arrin në rreth 138 milionë euro në vit. Përkundër këtyre shpenzimeve të mëdha, numri i personave të akomoduar në Gjadër ka qenë jashtëzakonisht i ulët dhe larg kapacitetit të parashikuar për mijëra emigrantë.
Kjo situatë ka nxitur kritika të ashpra nga opozita italiane, e cila e cilëson marrëveshjen një dështim me shpenzime të mëdha pa rezultate. Megjithatë, qeveria e Giorgia Melonit vijon të mbrojë paktin si një model të ri të kontrollit migrator që mund të ndiqet nga vende të tjera evropiane.
Burim: Report Tv
— Redaksia ZHURMA