Punimet e autostradës Kërçovë-Ohër po shterin lumin Treska
Eko-aktivistët thonë se burimet e lumit janë dëmtuar nga punimet dhe se është bërë ekocid klasik.
OHËR — Burimi kryesor i Lumit Treska në Kërçovë, i cili gjendet në fshatin Izvor, po thahet dalëngadalë. Ky burim ka dhënë nga 600 deri në 1000 litra ujë në sekondë, ndërsa ka pasur situata kur ka dhënë edhe 2000 litra ujë në sekondë, por kjo ka qenë dikur.
Eko-aktivistët për këtë gjendje fajin ua hedhin punimeve që po kryhen në autostradën Kërçovë-Ohër. Sipas eko-aktivistit Mile Aleksovski, nga Krushina e deri në Botun, të gjitha burimet që rrjedhin në Lumin Treska janë dëmtuar nga punimet e autostradës, ku gërmimet kanë qenë më të mëdha dhe janë ndërtuar ura e tunele.
Ai thekson se biodiversiteti është në kërcënim serioz, sepse është bërë ekocid klasik ndaj Lumit Treska. Eko-aktivisti kërkon që shteti të formojë një grup punues me ekspertë të fushës për të shqyrtuar gjendjen faktike dhe për të sjellë një plan për sanim teknik, për kthimin e burimeve të Lumit Treska.
Burimet: Tetova Sot; Zhurnal.mk; Bota Sot; Telegrafi; TV21 (klaster 5 outlets).