Punëtori shqiptar vdes në Francë pasi bie nga 7 metra lartësia

Një punëtor me origjinë shqiptare, rreth 50 vjeç, ka humbur jetën të premten, 9 tetor 2026, pasi ra nga një lartësi prej rreth shtatë metrash ndërsa kryente punime rikonstruksioni në çatinë e një shtëpie në fund të rrugës Henri-Thébaut, në Laigneville, departamenti i Oise-it, Francë. Ngjarja ka ndodhur rreth orës 11:30.

Sipas gazetës Courrier Picard, punëtori ishte i punësuar në një kompani që merret me mbulimin e çative dhe nuk arriti të mbijetonte plagët, pavarësisht ndërhyrjes së zjarrfikësve. Prokuroria e Republikës në Beauvais ka hapur hetim për veprën penale të vrasjes nga pakujdesia, e konfirmuar nga prokurori Nicolas Septe. Për viktimën pritet të kryhet autopsi me qëllim sqarimin e plotë të rrethanave të vdekjes.

Për të përcaktuar shkaqet e aksidentit dhe verifikuar respektimin e rregullave të sigurisë, është kërkuar ndërhyrja e Inspektoratit të Punës, i cili do të bëjë një vlerësim teknik. Në vendndodhje ka shkuar edhe kryetari i bashkisë së Laigneville, Christophe Dietrich, i cili shprehu keqardhje dhe tha: "Të shkosh në punë dhe të vdesësh për këtë, është e trishtueshme". Pronarja e shtëpisë ka deklaruar se procedura paraprake të punimeve ishin të zbatuara.