Goditet rrjeti shqiptar i drogës në Francë, dy persona në pranga
Autoritetet franceze kanë arrestuar dy shtetas shqiptarë si pjesë e një rrjeti trafiku heroine dhe kokaine në rajonin Haut-Bugey.
Një operacion i zhvilluar nga policia gjyqësore e Oyonnax në Francë ka çuar në arrestimin e dy shtetasve shqiptarë, të cilët akuzohen për drejtimin e një rrjeti të shpërndarjes së heroinës dhe kokainës në rajonin Haut-Bugey. Hetimet nisën gjatë muajit mars dhe u zgjeruan në muajt e verës përmes vëzhgimeve në terren, pas një denoncimi anonim që sinjalizoi aktivitetin e dyshimtë të një grupi të huaj.
Sipas autoriteteve, mënyra e paketimit dhe funksionimit ngjasonte me një strukturë të mëparshme të njohur si «Ronaldo». Për shpërndarjen e lëndës narkotike përdorej një llogari në aplikacionin WhatsApp, ndërsa takimet me blerësit realizoheshin në pyjet pranë komunave Echallon dhe Samognat. Gjatë ndalimit më 14 shtator, Armando Rexhepi u kap me 38 qese heroine prej 188 gramësh dhe 12 doza kokaine me peshë 11 gramë. Në banesën e përdorur nga 24-vjeçari Enea Kica, policia gjeti çanta me doza heroine, pajisje paketimi dhe një sasi prej 8.080 eurosh cash.