Pse dëshmitarët e Saradanit e quajnë 'qesharak' dënimin me 12 vite për Bajroviqin?

PRISHTINË — Dëshmitarët e masakrës së Saradanit, në komunën e Istogut, kanë shprehur pakënaqësi të thellë me vendimin e Gjykatës Themelore të Prishtinës, e cila edhe në rigjykim e ka dënuar me 12 vite burgim Ekrem Bajroviqin, të akuzuar për krime lufte gjatë viteve 1998-1999.

Naim Elshani, një nga dëshmitarët kryesorë, e ka quajtur vendimin 'qesharak', duke theksuar se ai vetë ende bart plagët fizike dhe psikologjike nga torturat që i janë bëre. 'Unë nuk pajtohem me këtë vendim. 12 vite burgim për një kriminel që e pashë me sytë e mi në krim, është çmenduri,' ka thënë Elshani, duke shtuar se ka kërkuar mbrojtje nga prokuroria, por pa sukses.

Elshani ka treguar se ka ardhur në gjykatë me shpenzimet e veta për pesë vjet, duke kërkuar transport për dëshmitarë të tjerë që kanë pësuar maltretime gjatë luftës. 'Nuk vijnë dëshmitarët që janë maltretuar gjatë viteve '90 deri në 1999. Unë nuk pajtohem me këtë vendim,' ka theksuar ai, duke shtuar se jetën e tij e ka pasur në rrezik disa herë dhe se nuk ka siguri.

Ylber Lipa, një tjetër dëshmitar, ka shprehur gjithashtu pakënaqësi, por ka thënë se duhet të respektohet vendimi i gjykatës, pavarësisht se ligjet e asaj kohe parashikonin dënim maksimal prej 15 vjetësh. 'Keqja është mospërkrahja e dëshmitarëve nga shteti. Mosinteresimi për të ardhur, pa marrë parasysh rrethanat me të cilat jemi përballur,' ka thënë Lipa, duke përmendur problemet shëndetësore dhe traumat psikologjike të dëshmitarëve.

Të dy dëshmitarët kanë shprehur shpresën se drejtësia, sado me vonesë, do të bjerë në vend, dhe kanë kërkuar që shteti të fuqizohet në hetimin dhe zbulimin e kriminelëve të luftës. Burim: Gazeta Express
— Redaksia ZHURMA